Awe mainta Sentro di Operashon Marítimo (MOC) di Wardakosta a risibí un petishon di parti di Kuerpo Polisial Kòrsou pa duna asistensha na búskeda di un hòmber ku lo a kai den laman, den serkania di Shut, na kosta Nort di Kòrsou. E hòmber tabata piska huntu ku un otro hòmber, na momentu ku un ola grandi a sorprendé nan. Un di e hòmbernan a resultá den laman i no tabata por a sali riba su mes forsa.
E helikòpter di Wardakosta despues di esaki a ser dirigí pa MOC pa saka e hòmber for di den laman. Na yegada di e helikòpter na Shut, e hòmber ku no tabata duna señal mas di bida, a keda saká for di den laman. Polis i tambe Brandweer tabata na e sitio. A hiba e kurpa na tera na Shut, kaminda dòkter a konstatá ku e persona a fayesé. Wardakosta ta desea famia di e hòmber forsa.