Dr. Horacio E. Oduber Hospital ta den pleno preparacion pa muda varios departamento pa asina por sigui cu renobacion den e hala oost di e edificio principal, esta Toren A. Lo cuminsa proximamente pa muda diferente departamento na e parti ya renoba. E proceso aki lo ta uno basta complica yena cu reto, pero Hospital ta sumamente contento cu e cambio positivo ya cu e localidad nobo tin hopi bentaha pa e pashent; e ta mas amplio, priva y empleadonan por traha na un manera mas eficiente cu aparatonan y cama mas nobo.
E transicion di departamentonan ta bin cu algun reto. Durante mudamento mester tene sigur cuenta pa minimalisa molester pe pashent, bishitante y tambe e trahado. Un bon planning ta esencial den esaki, entre otro e transport di material, e necesidadnan riba tereno boticario, IT, interieur, issuesnan tecnico y mas.
Despues cu logra muda e diferente departamentonan necesario y logra haci e otro banda bashi, por bisa cu ta yega na e fase final di renobacion di nos Hospital. Lo renoba e hala oost y alabes lo sigui cu e entrada principal y asina e “scope” completo di e proyecto grandi aki ta keda cla.
Trahando na un manera responsabel y sigur p’e pashentnan ta un prioridad fundamental pa e institucion aki. Na final di e proyecto, Hospital lo por brinda mas y miho cuido na tur pashent.