Den e conferencia di prensa di Prome Minister Mark Rutte diamars, 12 di januari, a informa cu a prolonga e lockdown cu tres siman pasa, te cu 9 di februari. Pero nan ta hopi preocupa di e loke nan ta mira di informacionnan for di Inglatera y Irlanda di e variante nobo di e coronavirus.
“E imagennan di Londen y awor Irlanda, ta alarmante y esey ta suavemente bisa,” Rutte a comenta. E cifranan di contagio ta subi explosivamente y hopi hospital no tin luga pa mas pashent.
E ta compronde cu e lockdown ta un presion pa esnan cu mester traha for di cas, hobennan cu tin cu sigui les tambe for di cas y empresarionan cu nan negoshi ta wordo afecta. Tur esaki ta trece frustracion y mas ainda pa mantene e pueblo trankil. “Nos mester sigui pusha pa e medidanan aki. Cu e vacuna tin un luz na horizonte, pero e lo dura un poco luna mas.”
E variante Britanico ta un di e motibonan pa e lockdown di tres siman mas. “Nos no tin otro alternativa. E cifranan no ta baha suficientemente rapido,” Rutte a bisa. Hasta por bisa, segun e mandatario, banda di COVID nos tin un problema nobo cu e mutante.
Minister De Jonge di Salud Publico, e variante Britanico, cu probablemente ta mas contagioso, ta responsabel pa algun porciente di e contagionan nobo na Hulanda. Ta kere su cu pronto e lo bay domina.
E frontera ta keda habri pa Britaniconan, aunke nan mester tin motibo valido pa biaha pa Hulanda. Pa nan ta conta e mesun condicionnan cu pa tur otro stranhero cu ta yega Hulanda: mustra un prueba reciente cu ta negativo.
