Illay Leon a defende su tesis exitosamente y asina a obtene e titulo di ‘Bachelor of Arts’ for di e programa Organization, Governance and Management, Facultad di Arte y Ciencia. Illay a defende su tesis titula ‘Sustainable Agricultural Entrepreneurship’ dilanti di e comision di graduacion cu tabata consisti di dr. Luc Alofs, Christie Mettes, MSc y Francielle Laclé, MSc. Presente tabata e manager di e programa OGM, Ahmet Talan, MSc, famia di Illay, docente di Universidad di Aruba y e coleganan di estudio.
Illay a investiga con por desaroya agricultura sostenibel na Aruba pa fortalece siguridad alimentario y resilencia economico. Illay a basa su investigacion riba e modelo Dougnut Economics, cu ta enfoca riba economia di conocemento, modelo di negoshi sostenibel, oportunidad financiero y e cuadro legal.
E participantenan di e investigacion ta emprendedornan agricola, specialista di industria, y creadonan di maneho envolvi den e sector agricultural di Aruba.
Un di e recomendacionnan ta pa emprendedornan pone enfoke riba cultivo diverso cu no solamente ta yuda aumenta biodiversidad, pero tambe por habri fuente nobo di ingreso. Otro recomendacion ta cu mester reforma e maneho di tera pa por permiti desaroyo di infrastructura basico.
Ta gradici e docentenan di e departamento di OGM y tur profesional cu a yuda of guia Illay como studiante. Gradicimento na tanto esnan di Universidad di Aruba y tur esnan externo, cu a contribui na un manera of otro na e acontecimento aki.
Pa mas informacion tocante e estudio OGM, bishita e website di Universidad di Aruba na http://www.ua.aw/ogm, e pagina di Facebook@UniversityofArubaOGM y e pagina di Instagram @ogm_ua.