Entrante sèptèmber studiantenan di e partinan Karibense i Oropeo di Reino por inskribí pa e beka di Reino. E supsidio aki ta trese posibilidat pa hasi un stazje òf interkambio di estudio riba e 6 islanan òf Hulanda pa un periodo di 21 dia pa 6 luna. E periodo di inskripshon ta kore te ku 14 di òktober 2025. E areglo ta konta pa studiantenan di nivel MBO 3/4, HBO i nivel WO ku ta sigui un estudio rekonosé fultaim.
Oportunidat úniko
E beka ta duna studiantenan e oportunidat pa wak mas leu ku e fronteranan di nan mes pais, haña eksperensia den un otro konteksto i sigui desaroyá akadémikamente i personalmente. E promé studiantenan ya a hasi uso di e supsidio aña pasá. E beka ta reembolsá gastunan pa entre otro biahe, estadia i kosto di bida. E montante ta komparábel ku e supsidio di Erasmus+ i ta alkansá un máksimo di €5.900 pa studiantenan Karibense. Esaki ta hasié finansieramente posibel pa studiantenan haña eksperensia atrabes di frontera.
Selekshon pa sorteo
E kantidat di beka disponibel ta limitá i ta varia pa isla. Selekshon ta tuma lugá pa medio di un sorteo. Studiantenan interesá por manda un meil na koninkrijksbeurs@rijksdienstcn.com òf bishitá e wèpsait: www.rijksdienstcn.com/onderwijs-cultuur-wetenschap/koninkrijksbeurs
Kontribushon na éksito di estudio i igualdat di oportunidat
E beka di Reino ta un di e medidanan dirigí riba oumento di éksito di estudio di studiantenan karibense. Tambe e ta dirigí riba ampliashon di oportunidat pa studiantenan karibense. E supsidio ta ofresé e studiantenan e oportunidat pa promé sera konosí temporalmente ku studiamentu òf hasi un stazje na un otro parti di Reino, promé ku inskribí pa un estudio avansá.
Mehorashon di éksito di estudio ta pará haltu riba agènda di e ministernan di enseñansa di Aruba, Kòrsou, Sint Maarten i Hulanda. Riba petishon di e ministernan akí, e tim di programa Strategic Education Alliance (SEA), www.strategiceducationalliance.org, a haña e enkargo pa fortalesé e éksito di estudio di studiantenan karibense strukturalmente pa 3 aña largu.