Akademia Popular Errol Scoop, e ala di formashon emansipatorio di Movementu Kousa Promé a hasi apertura di e siklo nobo titulá “Geo Polítika”. E interes pa e siklo aki tabata enorme. E interes pa sigui e siklo ta hopi haltu i a surpasá tur espektativa. Djaluna anochi na Sentro di Bario Santa Maria tabatin presentashon di e promé les “Kiko ta geopolitika” tresé pa hurista i antropólogo mr. dr. Rene Rosalia. Den e lès Rosalia a splika na plaka chikí kiko ta Geo Polítika i su aspektonan. Mas aleu Rosalia a splika kon konsentrashon di poder tabata den mundu i den kua direkshon e ta desaroyando aktualmente. Pa medio di ehèmpelnan konkreto i kla el a ilustrá kon Hulanda a apliká geo polítika den Caribe den siglo 20 i akshonnan konkreto pa ekspandé ekonomia Hulandes. Pa na final e mustra ku di mes Statuut ta un resultado lógiko ku mester a bini pa defendé i protehá interesnan ekonómiko hulandes.
Den su disertashon dosente Rosalia a mustra kon Hulanda a hasi uzo di di faktornan geográfiko ideal pa lanta i floresé su nogoshinan. Hulanda a hasi uzo di e ubikashon stratégiko di Kòrsou dilanti porta di Venezuela, e ruta di Kanal di Panama i su hafnan natural manera Sint Annabaai, Caracasbaai i Bullenbaai. Otro faktor importante ku Hulanda a hasi uzo di dje pa ekspandé su ekonomia i komèrsio tabata e pobresa ekstremo ku tabata reina aki den teritorio kolonial hulandes den e temporada di “paga tera” e prolongashon di sklabitut despues di 1863.
Tur esakinan tabata faktornan stratégiko geográfiko físiko i humano ku a indusí Hulanda pa realisá aktividatnan ekonómiko grandi i lukrativo aki na Kòrsou. Asina Hulanda a habri refineria CPIM aki na Kòrsou na 1914 i a lanta su kompania di nabegashon CSM. Pa duna servisio na barku i tankeronan Hulanda a habri un astiyeria Dokmaatschappij. Pa amplia i floresé su nogoshinan Hulanda a bini ku su kompania di aviashon KLM hasiendo uzo di Kòrsou komo trampolin pa move den Caribe, norte i sur amerika. Mineria tambe ta un tereno ku Hulanda a move ariba.
Na Mijnmaatschappij (Tafelberg) a koba wama i eksportá esaki pa Hulanda i Europa pa produkshon di kuminda pa bestia i mèrs pa mata. Tur e nogoshinan aki Hulanda a realisá basá riba e ubikashon stratégiko ideal di Kòrsou i basá riba situashonnan geográfiko ideal manera hafnan natural hundu, hopi awa den suela, serkania di Venezuela i labor barata.
Hulanda mester a protehá i defendé su nogoshinan. Kon el a hasi esaki? El a introdusí Statuut. Statuut ta resultado lógiko di geostrategia hulandes den Caribe. Pa mas klaridat riba e parti aki ta rekomendabel pa lesa e buki 70 aña statuut, 7 dékada di engaño, hipokresia i kolonialismo krioyo.
E úniko solushon ku dr. Rosalia ta mira ta pa drenta un proseso di dekolonisashon ku lo kulminá ku INDEPENDENSIA DI KORSOU!
Ainda tin oportunidat pa inskribí pa e siklo Geopolítika.
Tuma kontakto ku sra. Boelbaai na 6672178 I sr. Rosaria na 5126216
