Diadomingo 30 di october, durante e evento na Cede di MEP, ‘Un Aruba Stabiel cu MEP’, a wordo inaugura tambe e exposicion di historia y trayectoria di Partido Movimiento Electoral di Pueblo durante mas di 50 aña di exitencia di Partido MEP. Expo MEP, den e sala grandi di Cede, lo keda habri desde awe diamars 1 di november, y lo keda habri riba dianan 2 y 3 di november. Publico en general por pasa bishita Cede di MEP for di 5.30 pa 7.00 di anochi pa asina cera conoci un tiki mas di Partido MEP.
MEP a ser funda dia 9 di februari 1971 pa señor Betico Croes y den transcurso di añanan Partido MEP a contribui grandemente na e desaroyo politico, estatal, economico y social di nos pais. MEP como un partido social democrata a ser funda door di un movimiento popular a base di principionan democratico y cu un sentimento social pa bienestar di tur ciudadano den e pais aki. Cu potretnan y texto, den e exposicion por conoce e historia di fundacion di Partido MEP y e lucha cu a hiba hunto cu pueblo pa logra Status Aparte, nos propio Himno y Bandera, entre otro.
MEP ta un partido cu desde su fundacion te cu awor a conoce solamente tres lider!
Señor † Gilberto François ‘Betido’ Croes, señor Nelson Orlando ‘Nel’ Oduber, y señora Evelyn Wever-Croes. Tres Lider cu vision y determinacion firme pa lucha pa nos pais. E exposicion ta proyecta e trabounan grandi cu e tres lidernan aki a desplega pa nos pueblo durante nan liderazgo tanto den Partido como den gobernacion.
Partido MEP ta gradici señor Manolo Giel kende ta e motor tras di e bunita Expo MEP. Partido MEP, asina, tin tur informacion di historia di Partido y logronan di su 3 lidernan pa asina comparti cu tur ciudadano. Diamars 1, diaranson 2 y diahuebs 3 di November den oranan di atardi comunidad di Aruba por pasa bishita y disfruta di nos bunita Expo MEP.
