Su Mahestat Willem Alexander,
Nos a tuma nota di su Mahestat I famia royal su bishita na e islanan di Antia Hulandes. Un pais di hendenan humilde ku a wordu di set up pa outo-destrukshon; dividi, destrui I disolve dor di e kontinou intervenshonan, leinan I desishonan kolonial di bo gobiernonan. Ta masha bergonsoso pa mira tur e lidernan di e islanan aki nan gobiernonan I otronan I su Mahestat ku karanan tur na smile mientrastanto ku tur e suidadanonan Karibense inosente ta bibando den un estado di inigualdat I subordina na gobierno di Den Haag ku ta kontinua ta viola nan derechonan fundamental humano. Mi ta skirbi e karta aki komo un seguimiento na nos reunion I kombersashon personal na Boneiru riba 16 november 2013 I kartanan e anjanan despues kaminda su Mahestat su promesa na ami I e pueblo di Boneiru no a wordu kumpli. E promesa a wordu kibra I su Mahestat su gobierno abusando di su poder unilateral illegalmente a aneksa nos pueblo I nos isla dor di ankra nos den su Mahestat su konstitushon na Oktober 2017 bao di derechonan Desigual den violashon di tur derechonan di humanidat , un krimen kontra humanidat. Tur e inhustisia aki ta wordu komete pa leynan inhustu pa su mahestat su gobierno I bao di su mahestat su titulo: … “Nos Willem Alexander, pa grasia di Dios, Rei di Hulanda, Prins di Oranje Nassau, etc etc… Tur, ku lo mira I tende I lesa, salut! Ta laga sa:
Loke nos kier laga su Mahestat sa,… ta ku e resiente deskulpa ku ta un konfeshon boluntario I admishon di su Mahestat su antesesornan I gobiernonan su krimenan dor di su Mahestat su prome minister Rutte ta hipokrasia di nivel mas haltu, pasobra mientrastantu ku e gobeirno Hulandes ta pidiendo diskulpa pa hasi propaganda-mundial nan ta violando: artikulo 1, 55,73 I 103 di Charter di Nashonan Uni I resolushonan 742, 747, 945, 1514 I 1541 ku ta afirma e derechonan inalienabel di e pueblo di Boneiru di outo-determinashon. Mas alew su Mahestat su gobierno sistematikamente ta trapanda diferente di e pueblo di Boneiru su instrumentonan legal internashonal; Charter di Nashonan Uni, Deklarashon di Dekolonisashon di Nashonan Uni, Konbenio Internashonal di Derechonan Sivil I Politiko, Konbenio Internashonal di Derechonan Ekonomiko, Sosial I Kultural, Konbenio Internashonal riba Tur Forma di Deskriminashon Rasial, e Deklarashon di Derechonan di Pueblonan Indigino di Nashonan Uni.
E deskulpa ta inaseptabel mientrastantu ku su Mahestat ta kontinua ta kolonisando nos I nos rumanan Karibense. Por lo tanto nos ta dispuesto pa asepta e deskulpa Hulandes ku e demanda pa reparashon di nos derecho di outo-determinashon basa riba e siguiente terminonan: 1-Pa re-establese nos pueblo Boneriano su derecho pa un proseso I trajektoria hustu di outo-determinashon I dekolonisashon pa medio di restorashon di nos derechonan humano inalienabel I fundamental dor di posishonando legalmente/politikamente, poniendo Boneiru bek riba lista di Nashonan Uni komo Teritorio-Sin-Propio-Gobernashon;2-Pa start un proseso internashonal bao di guia di Nashonan Uni pa re-atkeri e derechonan di e pueblo Boneriano na su tera, su terenonan ku a wordu bende na findishi na 1868;3-Paro inmediato na e aktual/kontinou depopulashon I eradikashon di e pueblo Boneriano su demografia I su kultura, idioma I identidat. Nos ta spera ku abo komo nos Rei, ku nos tur ta respeta altamente, lo tuma e responsabilidat pa hasi tur kos den bo poder pa atende loke ta ariba menshona I debolbe nos propio-gobernashon bek na nos pueblo manera bo a priminti ami riba 16 november 2013, I Reina Wilhelmina a priminti Nashonan Uni I mundo I ku Reino a firma riba 26 juni 1945 I Lei di Reino di 1 juli 1863, kaminda nos tur lo ta mesun humano I mesun igual I liber.
Ku total konfiansa den Hustisia I Honestidat di su Altesa Royal