Durante wikènt tras di lomba Federashon di Basketbòl Boneriano den kolaborashon ku Indebon i Nederlandse Basketbal Bond, e bònt di basketbòl hulandes, a organisá un eksitoso klínika.
Pa hopi aña kaba nan ta hunga basketbòl na Boneiru i e deporte akí ta birando kada biaha mas popular, di manera ku nan a lanta algun klup. E federashon a tuma na su enkargo pa sigui desaroyá basketbòl mas aleu na Boneiru i wikènt pasá tabata un bunita paso padilanti.
Nederlandse Basketbal Bond a duna e tayer i esaki a konsistí di un kurso di introdukshon pa rèfri i coach. Riba djasabra tabatin klínika pa hóbennan te ku 20 aña. Pa terminá a sera e programa ku un klínika pa hende muhé, titulá ‘Her world, Her rules’ (Su mundu, su reglanan).
E federashon a duna di konosé ku nan ta hopi satisfecho ku e asistensia i nan ta kontentu di mira kuantu demanda tin pa e deporte akí. E federashon lo traha huntu ku e bònt hulandes i Indebon pa alsa e deporte na e nivel kaminda e mester ta. Esaki tabata e promé klínika i tin hopi mas na kaminda!
