BonaireFeatured

Komunikado pa prensa “punto di informashon medio ambiente”

Kvk 1

Dia 17 di yüni a firma un akuerdo di kolaborashon entre Ministerio di Infrastruktura i Maneho di Awa, Entidat Públiko Boneiru i Kámara di Komèrsio Boneiru tokante e Punto di Informashon Medio Ambiente. E punto di informashon akí lo ta ubiká den e hal di Kámara di Komèrsio na Kaya Amsterdam 23. Akinan empresarionan por haña informashon tokante e regulashon nobo pa loke ta trata medio ambiente ku ta bai introdusí pa empresanan, esta e Dekreto di Establesimentu i Aktividat BES (Inrichtingen- en activiteitenbesluit BES – IAB BES).

E informashon na e punto di informashon lo ta disponibel den kuater idioma: papiamentu, hulandes, ingles i spañó riba dianan di trabou entre 8:00 or i 12:00 or di mainta. E informashon akí lo ta disponibel digitalmente tambe riba wèpsait di e Punto di Informashon Medio Ambiente: www.infomilcn.com.  

For di 1 di sèptèmber e punto di informashon lo ta habrí durante e orario menshoná pa informashon na empresarionan i interesadonan.

Aspirashon di e gobièrnunan ta pa laga e regulashon drenta na vigor entrante 1 di yanüari 2023. Promé ku esaki lo konsultá e empresanan tokante kontenido di e regulashon.

Den e Dekreto di Establesimentu i Aktividat BES (IAB BES) ta bini regla di medio ambiente pa empresa. Ministerio di Infrastruktura i Maneho di Awa den estrecho koperashon ku Entidat Públiko Boneiru ta formulá e regulashon.

E dekreto ta regulá aktividat di empresa ku por tin un impakto riba medio ambiente. Por ehèmpel aktividatnan ku por kontaminá suela pa medio di trabou ku sierto supstansianan òf dùmpmentu di awa shushi ku no ta purifiká. Por ta trata tambe di aktividatnan ku por pone siguridat di e bisindario na peliger, manera almasenamentu  di supstansianan peligroso den depósito òf empake. E reglanan di medio ambiente ta sòru pa limitá òf evitá kontaminashon di medio ambiente i nan ta sòru pa un ambiente di biba mas limpi i mas seif pa hende i bestia. 

E Dekreto di Establesimentu i Aktividat BES (IAB BES) ta distinguí kuater kategoria di empresa: tipo 1, 2, 3 i 4. 

Empresanan di tipo 1 tin tiki impakto riba medio ambiente (por ehèmpel ofisina òf barbero / pelukero). Tipo 2 tin mas impakto riba medio ambiente komo konsekuensia di nan aktividatnan (por ehèmpel garashi òf pòmp di gasolin). Pa e empresanan akí reglanan general ta na vigor. Empresanan di tipo 3 tin mas konsekuensia ainda pa medio ambiente (por ehèmpel un sitio di depositá shushi). Tipo 4 ta empresanan kompleho, manera terminal di petroli. Tantu e empresanan di tipo 3 komo esunnan di tipo 4 tin mester di un pèrmit di medio ambiente.

E partidonan ku ta kolaborá ku otro ta kontentu di por informá e empresarionan den un etapa tempran i nan ta boga pa por yuda e empresarionan na nos isla riba tereno di problemanan di medio ambiente 

den kuadro di ‘Blue Destination’. Banda di esaki empresarionan durante  un bishita na Kámara di Komèrsio por hasi uso di e oportunidat tambe pa hasi otro preguntanan ku nan tin tokante hasimentu di negoshi. 

Cvd

Related posts

Cambionan positivo pa yuda detenidonan haya otro oportunidad

EA News Author

Minister Xiomara Maduro a haci desvelo di e obra di arte ‘Parha, hoya di cielo y tera’ di sra Ria Arrindell Broeks na IMSAN

EA News Author

Désirée E. Coffie Miembro di Konseho Insular Boneiru ta desapunta kon Kolegio Ehekutivo ta kumpli ku Konseho Insular

EA News Author

Leave a Comment

Whatsapp Message