Riba djabièrnè 28 di aprel a tene un kòntròl preliminar riba stèntnan di kuminda, bar i esenario (stage) relashoná ku Dia di Rincon riba 30 di aprel. Bou di guia di Direktorado Supervishon i Mantenshon di Lei di Entidat Públiko Boneiru a tene e kòntròl den kolaborashon ku Kuerpo di Bombero Hulanda Karibense (BKCN) i Kuerpo Polisial Hulanda Karibense(KPCN).
Durante e kòntròl a kontrolá si ta kumpli ku reglanan stipulá relashoná ku pèrmit di e aktividat. Esaki tin komo meta pa sòru ku tur kos ta tuma lugá di manera seif i salú.
Durante e kòntròl a konstatá algun iregularidat i lo duna esaki di konosé na e komishon organisadó ku ta esun responsabel pa e aktividat, ku na su turno mester sòru huntu ku ‘stenthouder’ nan pa tur kos ta na òrdu promé ku djadumingu 30 di aprel, kaminda lo hasi un kòntròl di nobo.
Mas aleu pa outomobilistanan, a sòru pa instalá bòrchinan di desviashon na entrada di Rincon i diferente otro sitio na momentu ku sera kayanan prinsipal ku barikada. Ta hasi un apelashon na shofùrnan pa no para tras di barikada i tampoko kita esakinan, pa asina sigurá ku kaminda ta aksesibel pa servisionan di emergensia.
