Cu gran placer, e proyecto Where Culture Lives (WCL) ta anuncia e lansamento di e asina yama, “WCL Premio pa Artista”. E competencia aki ta un oportunidad unico pa artista y creativonan di Aruba, Boneiro, Corsou, Saba, St. Eustatius y St. Maarten comparti, por medio di un obra artistico, nan interpretacion di e tema: “con cultura ta biba den bo comunidad.” Cuminsando dialuna 23 di februari 2026, artista y creativonan di tur disciplina por entrega un obra original cu ta capta e esencia di herencia cultural di nan isla. E premio aki ta habri pa obranan den e siguiente areanan: arte visual, musica, teatro, baile, literatura, poesia, cine, arte culinario, fotografia y media digital. Tambe ta acepta obranan transdisciplinario. Jorien Wuite, director di Lemonade B.V., a comparti: “cultura y herencia no ta algo cu ta biba solamente den museo, pero tambe den nos cayanan, cushinanan, festivalnan y den nos experencianan diario.” El a agrega: “e premio aki ta duna importancia na e titulo di e proyecto pasobra e ta un invitacion pa artista y creativonan expresa con cultura ta biba na nan isla den nan mesun forma creativo.” E resultadonan di e investigacion di e proyecto Where Culture Lives ta mustra cu expresion artistico ta un di e maneranan principal pa genera y documenta conocemento di bida cultural den nos region. Pues obranan artistico por conecta pasado cu presente y ademas por papia tocante sosedidonan den comunidad di gran balor. E grupo di investigacion (Ludmila Duncan, Gregory T. E. Richardson, Elton Villarreal y Jorien Wuite) ta considera e premio aki uno di gran importancia. Segun nan, e iniciativa aki ta contribui na un interpretacion mas profundo di e resultadonan di investigacion door cu ta inclui diferente sesion interactivo unda ta averigua e resultadonan cu comunidad. E sesionnan aki lo tuma luga na tur isla na april 2026. E proyecto tambe ta spera cu e premio aki lo aumenta visibilidad di e artistanan y creativonan den Caribe Hulandes y cu lo fiha e posicion di arte y cultura Caribense mas ainda. E intencion tambe ta pa contribui na un dialogo mas amplio tocante e maneho di cultura na nos islanan. Durante e encuentronan interactivo cu comunidad, lo entrega e premionan. E ganado absoluto lo ricibi un premio di $500 dollar, e di dos luga, $250 y e di tres lugar, $125. E proceso pa por participa ta simpel y ta habri pa cualkier participante cu ta biba na un di e islanan di Caribe Hulandes. Por entrega un obra original den cualkier estilo, manera un pintura, cantica, poema, relato of video etc. Mester manda esaki via email na: whereculturelivesproject@gmail.com. E fechanan pa entrega ta entre 23 di februari 2026 y 25 di maart 2026. Participantenan mester inclui: nomber completo, isla unda ta biba, titulo di e obra, tipo di arte, un descripcion cortico splicando kico e obra ta nifica y e relacion cu e tema, “con cultura ta biba na bo isla”. Den e anexo lo por manda informacion adicional si ta desea. Por manda e obra como file of via di link di download (WeTransfer y Google Drive ta wordo acepta). E participantenan mester duna permiso pa por uza e obra den e proyecto Where Culture Lives pa metanan informativo. Tambe mester inclui informacion di contacto (email, number di telefon y di WhatsApp). Por ultimo, por entrega obranan den cualkier idioma cu ta desea. Si tin pregunta, por tuma contacto libremente via e e-mail whereculturelivesproject@gmail.com. E cuerpo di hurado lo evalua e obranan desde 26 di Maart 2026 y lo anuncia e ganadornan na april 2026. Lo presenta e obranan ganador durante e sesionnan interactivo. E proyecto, Where Culture Lives, ta un proyecto di Ministerio di Enseñansa, Cultura y Ciencia na Hulanda y Boneiro (OCW y OCW-CG) ehecuta pa Lemonade B.V., operando for di St. Maarten.
Lansamento di e “Where Culture Lives Premio pa Artista” Open Call pa artista y creativo an den Caribe Hulandes
