Durante e reunion publico diaranson unda cu minister Ursell Arends tabata presente pa duna
splicacion riba e situacion di Serlimar, Lider di fraccion di MAS parlamentario Marisol Lopez Tromp a splica cu e
problema di Serlimar ta rekeri un solucion urgente. Durante su speech e parlamentario a conta cu tempo e tabata
minister e problema di Serlimar ta uno cu a caus’e hopi anochinan di soño perdi ya cu mester a busca un solucion
pa asina haci un opschoning y stop e corupcion cu tabatin den e compania pa hopi aña y cu a causa hopi otro
problema mas.
Esencia di e problema na Serlimar ta cu tin dos solucion: Faillissement of prolongacion di e surseance van betaling.
Por papia riba diferente topico manera entre otro personal, plan di Parkietenbos y cambio di ley pero e mas
importante ta si Serlimar lo wordo declara bancarota of si ta sigui cu e surseance van betaling. Na mei 2020 e
board di Serlimar a entrega un peticion pa un surseance van betaling pa evita cu mester manda tur trahador cas. E
decision aki a conta cu sosten di minister Lopez Tromp kende e tempo ey tabata e minister encarga cu Serlimar.
Ora Minister Lopez Tromp a tuma e cartera di Serlimar e situacion tabata asina malo no tabatin otro solucion cu
un surseance van betaling. Pakiko? No tabatin placa mas ni pa paga e trahadornan fin di luna. Tampoco tabatin
placa pa paga esnan cu e compania mes tabata debe. Un surseance van betaling ta pone cu politica no por mete
facilmente mas den e maneho di e compania: Niun debchi no por sali di e compania sin aprobacion di e
bewindvoerder. Un decision cu e coleganan di minister Lopez Tromp no a aprecia e tempo ey y tabata un di e
motibonan principal pakiko a bula cabes di Lopez Tromp. E surseance ta valido te dia 2 di februari 2022. Si pa e
fecha aki no busca un solucion, esaki ta ensera cu cos ta pinta scur pa Serlimar su futuro.
Parlamentario Lopez Tromp a haci e siguiente preguntanan na Minister Ursell Arends:
Ta bai nombra un director nobo pa Serlimar mirando cu e director anterior a wordo kita pa mal maneho y
falsificacion di diploma? A saca un vacatura nobo pa e funcion aki?
Kiko ta e exigencianan pa e director nobo? Ta tene cuenta cu good corporate governance?
Tin un HR consultant nobo na Serlimar y kiko ta loke su trabou ta ensera y kiko el a haci te cu awor?
Si bin cu un reorganisacion cuanto placa esaki lo bai costa? Minister ta sostene e idea di un reorganisacion? E
reorganisacion aki a tuma luga caba?
Kiko ta e accionnan cu e bewindvoerder a tuma te cu awor pa prolonga e surseance van betaling?
Parlamentario Lopez Tromp ta kere cu e surseance van betaling tabata un bon decision pa Serlimar mirando cu lo
tin miho control riba e forma con placa ta wordo gasta den e compania y pa evita decisionnan robes,
nombracionnan politico y mal maneho. E tempo ey hues a duna e Hunta, e director sr Anko Koopmans y minister
Lopez Tromp razon tambe cu un vonnis na fabor di un surseance van betaling. Si e hues lo no a aproba e
surseance van betaling aña pasa, awe e trahadornan lo tabata riba caya sin trabou. Pa e motibo aki e
parlamentario ta keda puntra Minister Ursell Arends kiko ta e exigencianan y condicionnan actual pa prolongacion
di e surseance van betaling. E board di e tempo ey ya ta practicamente no existente ya cu ta un miembro so a
sobra cu ta Roland Croes director di Setar y cu den e board ta represnta ATIA. Otro pregunta cu parlamentario
Lopez Tromp a haci ta pa sa ki pasonan ta bai tuma pa nombra mas hende capacita y segun reglanan di good
governance den e board di Serlimar.
Alabes a puntra e minister tambe si ta bin cu cambionan di ley pa regula e aspecto di tarifa di Serlimar y si lo bai
laga Serimar para di berdad riba su mes pianan y hiba un maneho drechi. Kiko a acorda encuanto Serlimar pa loke
ta e consehonan di CAFT cu no kier pa gobierno keda hinca placa den Serlimar? Tambe a puntra kiko ta bai haci pa
cumpli cu tur e debenan cu Serlimar tin habri ainda y no por paga. Por ultimo a puntra kiko a para cu tur e
investigacionnan, cu bou maneho di Marisol Lopez Tromp a cuminsa na 2020 y ainda no a tende kiko a sali afo di
esakinan of si ainda e investigacionnan aki ta andando. Minister Ursell Arends sa si e investigacionnan aki ta
afgerond y kiko a sali afo di esakinan? Kiko ta bai haci cu e nombracionnan politico cu den transcurso di añan a bin
tuma luga den Serlimar?
Minister Arends a contesta cu pa fin di e aña aki e lo por duna un contesta riba e desaroyonan di e
investigacionnan cu ta andando desde 2020 den Serlimar. Pa loke ta e presupuesto minister Arends a menciona cu
lo duna un bista den e presupuesto aunke cu no tin un suma specifico poni pa Serlimar pero cu si a cuantifica e
servicionan di e compania. Y cu aunke cu Serlimar no tin placa lo busca un director nobo pa maneha e compania
pero cu lo warda te dia 2 di februari 2022 prome cu tuma desicionnan tambe pa loke ta regarda personal cualifica
pa maneha e luga.
Lider di Fraccion Marisol Lopez Tromp (MAS): Ainda tin investigacionnan di corupcion andando den Serlimar
