Durante su di sinku Kongreso Statutario, ku a tuma lugá resientemente, Movementu 21 (M21) a nombra i instalá un direktiva nobo pa guia e partido den su siguiente fase di desaroyo polítiko.
E Kongreso Statutario 2025 a representá un momento importante di reflekshon i fortalesimentu interno. E direktiva nobo a asumí su responsabilidat ku un kompromiso pa inisiá un proseso di optimalisashon i kresementu di e movementu, reforsando asina e posishon di M21 komo un opshon polítiko sólido, serka di pueblo i kla prepará pa e retonan di futuro.
E presidente nobo di M21, sr Carlos López Natera, a ekspresá su gratitut i determinashon pa sigui traha pa un Boneiru mas uní, mas hustu i mas próspero.
“Awor ta nos momentu pa krese, pa avansá i pa sigui traha huntu pa Boneiru,” segun Carlos López Natera.
M21 ta mira futuro ku konfiansa, konvensí ku optimalisashon, unidat i liderazgo dediká, kombiná ku perseveransia por trese e kambio ku Boneiru tin mester di dje. M21 ta invitá tur miembro, simpatisante i siudadanonan en general ku ta kere den progreso real pa uni nan bos i djòin e barku di progreso.
M21: Un bon futuro pa Boneiru. Nos felisidat komo hende ta den nos propio man, i huntu nos lo logra.
