Un grupo di trahadonan publico y semi-publico awe den oranan di atardi a marcha for di ex Juliana School dirección di Parlamento y Gobierno pa entrega un Manifiesto.
Na Parlamento e grupo a entrega copia di e Manifesto na Presidente di Parlamento Edgard Vrolijk y despues di esey a cana bay dirección di Gobierno, unda mayoría miembro di Conseho di Minister a compaña Prome Minister Wever Croes pa ricibi e documento for di presidente di SIMAR Josephine Albertus.
Den e Manifesto ta para cu esaki ta firma pa 12 sindicato y e organización cu ta representa pensionadonan di Gobierno. Sin embargo por a constata no ta e gran mayoría di miembronan di e organisacionnan menciona tabata presente na e Manifestacion.
Nan a menciona na ambos luga cu e costo di vida a subi hopi mientras cu salario ta baha. Nan a pidi tambe pa haya contesta riba nan Manifesto den un siman di tempo. Prome Minister a bisa e grupo cu e lo trata pa nan haya e contesta prome cu un siman.
