Minister Geoffrey Wever: No mester Rijkswet pa Supervision Financiero.
Den su declaracionan haci minister Wever a splica cu ya pa añas caba tin supervision financiero.
* No mester di rijkswet HOFA pa sigura supervision financiero pa drecha pais su maneho financiero, pasobra esaki ta existi caba hopi aña.
* No mester di rijkswet pasobra nos debe ta bahando caba.
* Aruba ta cumpliendo cu tur normanan di normanan financiero caba desde algun tempo.
* Rijkswet HOFA no ta un instrument pa maneho financiero responsabel, a traha structuralmente riba esey caba. (Den gabinete anterior di cual e tabata minister)
Minister Wever: LAFT v/s HOFA
Rijkswet HOFA manera cu coalicion a negocia ta bay duna mas “libertad” na gobierno pa maneha finanzas publico manera cu nan ta “desea.” Minister Wever a duna algun ehempel con e LAFT ta mas riguroso cu HOFA;
* LAFT ta exigi pa e gasto di personal no mag di pasa e 10% di nos GDP, mientras cu rijkswet HOFA lo ta mas “flexibel” y no ta pone un plafond pa esaki. Den otro palabra gobierno lo tin e “libertad” pa subi e gasto di personal “cuanto cu nan kier!” Esaki sigur ta trece un peliger enorme cu ne di nombracionan politico na cantidad, considerando con Mike Eman y AVP a yena Cocolishi entre 2009-2017 cu masha hopi trahador mes. E tempo ey a gasta mas o menos 12.3 miyon na salario di Cocolishi so, mientras gabinete anterior di Evelyn Wever-Croes a gasta apenas 2.4 miyon florin. Un reduccion di casi 10 miyon florin pa aña! Pakico no keda cu e normanan di LAFT?
* LAFT ta exigi pa gobierno produci minimo 1% surplus pa paga e debe nacional y bah’e structuralmente. Minister Wever a declara cu HOFA lo duna nan atrobe e “libertad” pa dicidi cuanto debe lo paga cada aña. E la duna un ehempel: si un aña tin un surplus di 70 miyon florin, lo por paga banconan 10 miyon y “inverti” 60 miyon. E pregunta cu pueblo lo tin ta; cu ki “costo” e libertad aki lo bin, specialmente sabiendo con e maneho financiero di AVP tabata den pasado? Ki garantia tin cu gobierno lo pone prioridad pa baha debe y asina saca nos pais padilanti?
* LAFT tin 8 punto den cual supervision financiero di Hulanda tin algo di bisa, mientras HOFA lo tin apenas 3. Den otro palabra “mas flexibilidad” y menos supervision ta loke Futuro y AVP ta aspira pa ricibi atraves di HOFA! Un postura completamente contrario na esun durante campaña y hasta di gobierno cu a tilda oposicion di tin “miedo” di supervision financiero. Pakico anto ta negocia pa baha e supervision financiero di 8 pa 3 punto? Kico Gerlien y Mike Eman ta scondiendo?
* Adicionalmente Minister Wever a laga sa cu si nan kier “fia mas placa” nan lo por haya esaki na un interes di 3.2% for di Hulanda. E declaracion aki riba su mes ta preocupante, mirando cu ya ta papiando atrobe di kier crea debe y baha pago di debenan! Hulanda ta bezig ta namora gobierno cu un HOFA cu ta priminti bon interes pa mas debe y pa gobierno tuma su tempo numa pa paga e debenan cu pais tin. Mike Eman lo ta contento!
Conclusion HOFA: Un roadmap pa haci y deshaci atrobe
Ta parce cu minister Wever y Gerlien a “adopta” e mentalidad y agenda di AVP 2009-2017; Ta papia di inversion so manera 2009-2017, sin preocupacion pa hisa e debe!! Ta papia di adkiri mas fondo pa inversion, flexibilidad den supervision financiero, pero kende ta duna garantia cu nan no lo hipoteca nos pais atrobe cu debenan “barata” di Hulanda y asina mara nos den e rijkswet HOFA pa semper? Pakico ta busca flexibilidad den paga debe mientras tin posibilidad pa yega 50% di nos GDP na debe, si gobierno actual continua cu e mesun maneho financiero di e gobierno anterior?
Press release: MEP