Na ocasion di e conmemoracion di 70 Aña di Nos Escudo di Aruba (15 di november 1955 – 15 di november 2025), Departamento di Cultura Aruba (DCA) ta anuncia cu a elabora y publica un serie di material educativo y cultural digital dedica na e simbolo nacional cu ta representa nos orguyo, union y identidad como pueblo.
E escudo di Aruba ta un simbolo di orguyo, union y historia — un refleho di nos balornan, nos identidad y nos progreso. DCA ta kere firmemente cu conocemento y aprecio pa nos simbolonan nacional ta fortifica e sentido di pertenencia y identidad cultural, particularmente den nos hubentud.
Pa motibo aki, DCA a traha riba materialnan educativo y informativo cu ta disponibel pa uso den scolnan y pa toda comunidad Arubiano.
Material pa Scolnan:
* Un One Pager – 70 Aña di Nos Escudo di Aruba cu informacion basico y visual atractivo pa mucha di diferente edad.
* Un boeklet digital cu explicacion amplio riba e historia, simbolismo y diseño di nos escudo, disponible pa descarga digital.
Material pa Comunidad:
* Un segmento televisivo especial na programa Bentana Cultural (Telearuba) dedica na e aniversario di nos escudo.
* Publicacion di contenido educativo y cultural riba e plataforma digital di DCA (Facebook, Instagram, YouTube) y den medionan di prensa local.
DCA ta invita tur scolnan primario y secundario pa bishita nos website y uza e materialnan aki como un recurso educativo pa motiva discusion y orguyo nacional den lesnan y actividadnan di clase.
Pa mas informacion y pa yega na e materialnan digital, por bishita:
👉 www.cultura.aw
Departamento di Cultura Aruba ta gradici tur scolnan, educadornan y institucionnan pa nan cooperacion y compromiso continuo pa inspira y forma nos futuro generacionnan.
Press release: Departamento di Cultura Aruba (DCA)
