ORANJESTAD –E campaña Cumpra Local ta continua y pa pone poco ambiente den Caya Betico Croes durante di e temporada di Dianan di Fiesta den, Minister Xiomara Maduro a bini cu e iniciativa pa facilita pa por tin algun entretenimento den Caya Betico Croes durante e luna di december. Na dos punto den Caya Betico Croes lo tin presentacion di miniteca cu lo entrene cu musica di fin di aña tur esnan cu haci nan compras pa e temporada di fiesta. E dos puntonan lo ta La Moderna y dilanti ex Bon Bini Bazar.
E meta di e campaña Cumpra Local, Di Nos Pa Nos Mes ta pa conscientisa nos comunidad riba e importancia pa cumpra producto y/of haci uso di servicio di nos negoshinan local pa yuda reconstrui economia di Pais Aruba. Cumprando local tin su beneficio pa Pais Aruba, como cliente bo ta sostene empleo y comercio local, bo ta inverti den economia local pa mantene e placa na Aruba y bo ta yuda stimula entrepeneurship pa futuro generacion. Bo tin un compromiso cu nos Pais, Cumpra Local, Di Nos Pa Nos Mes.
Mayan un bes mas lo tin entretenimento den Caya Betico Croes y ta un oportunidad pa por haci compras. Un invitacion na nos comerciantenan pa probecha di e oportunidad cu tin entretenimento y ambiente y asina ofrece nan producto- y ofertanan na e clientenan durante e temporada aki.
