Ku lantamentu di Mesa di Klima Boneiru, Kolegio Ehekutivo ta pone un paso
importante den e lucha kontra e impakto di kambio di klima. Kada biaha ta mas visibel kon
Boneiru ta eksperensiá e konsekuensianan di kondishonnan ekstremo di wer, manera
yobida pisá, periodonan di sekura ku ta dura mas largu, olanan di kalor i temperatura di
awa di laman ku ta subiendo. E kambionan akí no tin solamente influensia riba hende,
pero nan ta un menasa tambe pa e naturalesa úniko di nos isla, entre otro nos refnan di
koral i bestia di laman.
Ku nombramentu di un presidente eksperensiá i komprometí, mesora ta bira bon kla
kuantu na serio nos isla ta tuma e desafio di kambio di klima. A pidi sr Reynolds ‘Nolly’
Oleana pa bira presidente pa motibu di su konosementu profundo di tantu nos komunidat
lokal komo di e naturalesa úniko di Boneiru. Su liderazgo i eksperensia ta di balor
inkalkulabel pa uni e diferente partidonan na mesa i stipulá un rumbo sostenibel.
Bou di guia di e presidente, e grupo di proyekto ku ta konsistí di representantenan di
Entidat Públiko Boneiru, gobièrnu di Reino i ofisinanan lokal, huntu ku nos komunidat ta
bai indiká un ruta pa determiná e pasonan konkreto ku mester kondusí na un asina yamá
plan di klima pa Boneiru. Ta di importansia krusial pa desaroyá un plan di klima ku tin
sosten amplio i ku ta protehá tantu nos hendenan komo nos naturalesa na Boneiru pa nos
por konservá nos isla pa nos yunan i e generashonnan despues.
‘E urgensia ta bon kla’, segun ponensia di Kolegio Ehekutivo i presidente di e Mesa di
Klima. ‘Kambio di klima ta afektá henter nos ekosistema i nos supsistensia. Solamente pa
medio di drenta den akshon awor akí, nos por mantené un Boneiru habitabel.’ E
kòmbersashonnan den e Mesa di Klima ta duna espasio pa diálogo entre siudadanonan,
empresanan i interesadonan. Huntu nos ta traha riba un aserkamentu ku ta hasi Boneiru
mas resiliente.
A stimulá e diálogo akí mas tantu ainda durante e townhall meeting dia 18 di desèmber,
kaminda diputado A. Cicilia a duna splikashon tokante importansia di e Mesa di Klima
Boneiru. E presidente di e Mesa di Klima a introdusí e grupo di proyekto i a presentá e
plan di aserkamentu, den kua a splika kon huntu nos por yega na un plan di klima pa un
Boneiru habitabel. E enkuentro a ofresé espasio tambe pa pregunta i pa kompartí idea.
E kòmbersashonnan ta tuma lugá den e promé i e di dos kuartal di aña 2025, i despues di
esei ta formulá e plannan konkreto i e palabrashonnan den un Intenshon di Klima i
finalmente na aña 2026 den un Plan di Klima. E proseso akí ta duna habitantenan di
Boneiru oportunidat pa yuda pensa tokante futuro di nan isla.
Ku e Mesa di Klima Boneiru, Kolegio Ehekutivo ta suprayá su kompromiso ku un futuro
sostenibel, kaminda bienestar di hende i naturalesa ta bini na promé lugá.