Dia prome di september 2022, dia di prensa, dia di nos como tur esnan cu tin e tarea pa educa y informa un comunidad completo. E ta un dia pa celebra, pero alabes un dia pa para keto un rato y reflexiona riba nos trabao y tarea cu nos tin, kico e ta , kico por mehora y kico nos ta haci bon y/of malo.
Semper bay tin dos banda di medaya di un situacion, pero loke ta e esencia y importante di nos trabao ta pa ta neutral y trece e panorama di loke tin pa e pueblo ta na altura di loke ta pasando y pa e pueblo siña mas di dje, compronde y pa e mes saca su propio conclusionnan.
Nos trabao ta un trabao hopi importante pa brinda loke ta e informacion cu hecho y prueba. Instiga, duna propio opinion, kere di ta miho, pone number si ta number un of ta number 10 no ta relevante, loke ta relevante ta bo sinceridad y e realidad cu ta keda treci padilanti.
Den mundo di medio di comunicacion nos tin hopi pa drecha, hopi pa cambia, hopi pa structura y hopi pa aporta di loke ta e liña di conocemento. Esaki ta un tarea di nos den medio pa boso como comunidad.
E grado di mentalidad y pensamento di un pueblo hopi biaha nos tin e poder pa guia esaki y si nos como periodistanan tuma esaki na serio, educando un comunidad cu bon informacion y no trece mal
P’esey mes abo como ciudadano scoge semper loke ta calidad di noticia cu abo por amplia bo conocemento di un forma corecto. Mesun cos cu bo ta scoge pa bisti un paña, come un cuminda, cumpra un auto of cumpra un cas, bebe un remedi cu ta bon pa bo, ta bo tarea tambe ta pa scoge bo plataforma , corant, radio,website cu ta duna bo e informacionnan relevante pa bo conocemento. Felis Dia di Prensa pa tur colega y cu awe por ta un dia di reflexiona di nos compromiso di nos trabao pa un miho Aruba.
Mi persona mes tin un trayectorio largo den medio di comunicacion, amplio experiencia den tur sector y ta e prome hende muhe den medio di tin su propio plataforma di website di NOTICIA den e mundo di hende homber cu ta domina e area aki pa basta aña. Un total di 23 aña di experiencia, mi a caba mi MAVO , Operations management y haci diferente curso di fotografia, filmacion, Luz, editing, write scripting, curso di papiamento. Mi a yuda lanta y forma parti di un planta di televisión completamente nobo na Boneiro, Energia Vicion cu awe ta DutchCaribbean TV. Awe ta propietario di mi propio plataforma EAnews.com pa algun aña caba cu dia pa dia ta crece y lo sigui expande cu mas proyecto na caminda pa sigui informa y educa na e forma corecto.
