Den e wikènt tras di lomba un kantidat rèkert di partner for di e sektor di turismo di Boneiru na un manera impreshonante a presentá Boneiru durante e Beneath the Sea Show na New Jersy, e bolsa pa konsumidó mas grandi na Merka riba tereno di eksposishon di oséano, buseo i biahe di buseo. Un representashon fuerte di miembronan di BONHATA, entre otro Chogogo Beach & Dive Resort, Delfins Beach Resort, Dive Friends Bonaire, Buddy Dive Resort, Divi Flamingo Beach Resort, Grand Windsock Bonaire, Scuba Elite, Van der Valk Plaza Beach & Dive Resort i Captain Don’s Habitat a okupá e stènt di Boneiru.
E esfuerso kolektivo akí a marka e delegashon di mas grandi di partnernan di turismo boneriano ku a yega di asistí na e evento akí. E bolsa ku a dura tres dia, di 28 te ku 30 di mart, a brinda un oportunidat ekselente pa promové Boneiru komo destinashon tòp di buseo i pa na mes momentu destaká e buelo nòn stòp nobo di JetBlue for di JFK (New York) pa Boneiru. E konekshon direkto akí ta hunga un ròl krusial den Boneiru su strategia pa amplia su presensia riba merkado merikano. Aparte di aksentuá Boneiru su buseo di klase mundial, e evento a sirbi tambe pa mustra kon multifasétiko nos isla ta, ku un enfoke riba eko-turismo, kultura i gastronomia.
Tokante BONHATA
Bonaire Hotel and Tourism Association (BONHATA) ta representá empresanan den sector di turismo na Boneiru i ta komprometé su mes na kresementu sostenibel, mehorashon di kalidat i promoshon di nos isla komo destinashon tòp di biahe. Pa mas informashon bo por tuma kontakto ku:
BONHATA info@bonhata.org | www.bonhata.org