Minister di Salud Publico, Desaroyo Social y Labor, señor Richinel Brug, tabata bishita den studio live siman pasa na Suppa Duppa Morning Show riba Laser 101.1 FM pa lansa oficialmente e nobo jingle pa accentua consenshi riba salud mental, titula “You Good?”.
E jingle aki, cu ta inclui artista localnan King James y Natisha Hanson, cu produccion di XavvoKnockin, ta parti di un campaña nacional grandi pa kita e estigma riba salud mental y pa laga publico sa cu tin sosten disponibel semper.
Durante e programa den live, minister Brug a enfatisa importancia continua di consenshi riba salud mental, mas tanto awor cu residente ainda tin reto emocional, social y economico. E aclara cu campaña “You Good?” ta stimula e comunidad pa papia habri y wak un riba otro.
“Salud mental ta forma parti den tur cas y tur famia. Cu e campaña aki, nos kier manda un mensahe simpel pero poderoso: wak un riba otro, papia cu otro, Bo no ta so. Bo bienestar ta importante. Y bo gobierno ta compromete pa kita e estigma, mehora acceso na cuido, y fortalece e sistema di sosten cu nos comunidad ta merece.”
Minister Brug a pidi publico tambe pa uza e jingle manera un recordatorio pa keda conecta:
“Si cu bo no ta bon, ta okay pa bisa esey. Y si un hende yega na bo, tuma un momento pa tende. Hunto nos por crea un cultura unda salud mental ta compronde, respeta y sostene.”