Featured Politica

Minister di Finansa y Cultura Xiomara Maduro ta cita Gobernador su discurso na apertura di aña Parlamentario 2022-2023


E maneho di Gobierno ta pa yega na finansa publico duradero y responsabel

Awe diamars mainta tabata apertura di Aña Parlamentario y manera ta un tradicion e dia aki Su Excelencia Gobernador di Aruba ta tene su discurso caminda e ta trece dilanti e maneho di Gobierno di Aruba pa e siguiente Aña Parlamentario.

 Temponan bon y Temponan Duro

Gobernador di Aruba durante su discurso a trece dilanti cu den bida bo ta hayabo ta confronta temponan bon y duro, pero entre e temponan aki nos ta haya oportunidad pa bira mas fuerte y alabes humilde como ser humano. Ultimo añanan Aruba a keda confronta cu temponan duro, cu a marca nos isla y nos comunidad, lagando lesnan importante pa futuro desaroyo di nos Pais, pero nos Pais Aruba ta determina pa lanta bek y sigui lucha pa bienestar di un y tur.

Finansa Publico Duradero y Responsabel

E maneho di Gobierno ta pa yega na finansa publico duradero y responsabel. Un di e obhetivonan ta pa reduci debe y gastonan di interes di acuerdo cu normanan internacional manera recomenda pa e Fondo Monetario Internacional y palabracion haci cu Hulanda na 2018.

Efectonan riba finansa publico lo tuma su tempo

Nos Pais a sali di e tempo duro cu e virus di Covid-19 a hinca nos pais aden, cu yudansa, pero nos situacion ta keda delicado. Nos economia, sosteni pa e actividad principal – cu ta nos turismo – ta mustrando señalnan di un recuperacion fuerte. E efectonan riba e.o. finansa publico lo tin su impacto pa hopi aña ainda. Lo tuma su tempo pa yega atrobe na resultadonan presupuestario confortante. Y e heridanan cu e pandemia a ocasiona den cada hogar aki na Aruba, ainda no a cura completamente.

Presupuesto 2023

Den e Presupuesto pa 2023, a logra reduci diferente gasto y aumenta entradanan di Pais door di pone enfasis riba e.o. cumplimento di impuesto. E gastonan di interes di nos debenan sinembargo ainda ta un peso grandi riba nos finansa publico. E palabracionnan haci cu Hulanda den cuadro di sosten di likides durante 2020, ta den pleno ehecucion atraves di e paketenan di reforma pa asina cumpli cu e acuerdonan haci recientemente cu Hulanda. Departamentonan di Gobierno ta trahando diligentemente riba mas di 60 punto di accion, cu ta canando riba 8 diferente area di maneho. Pa mayoria di e proyectonan ya caba tabatin plannan di ehecucion traha den cuadro di e masterplan traha pa profesionalnan: Reposicionando Rumbo di nos Pais. Den e Presupuesto 2023 tin 12,5 miyon florin destina pa implementacion di proyectonan aki.

Paketenan di Reforma

Despues di a haci hopi investigacion y estudio Gobierno lo cuminsa awor cu ehecucion di e paketenan di reforma. Meta ta pa crea un base economico mas solido cu lo permiti nos recupera mas liher den caso cu nos experiencia contratiempo economico. Den e cuadro aki y den dialogo cu Hulanda lo sigui enfoca den e periodo nos dilanti riba e plannan pa fortifica nos economia, finansa publico, organisacion di gobierno, cuido di salud, enseñansa y estado di derecho.

Union Solidaridad y Respet

Na final di su discurso, Gobernador a enfatisa cu pa nos pais recupera por completo economicamente, financieramente y socialmente, ta esencial pa nos tin union, solidaridad y respet pa cu e causa. Gobierno mester demostra disciplina financiero; inversion priva y publico mester wordo motiva; y accionnan concreto mester tuma lugar den conhunto y dialogo cu gruponan di interes pa drecha e bienestar di e pueblo. Asina so nos lo logra e recuperacion completo di nos Pais.

Minister di Finansa y Cultura Xiomara Maduro ta mira e aña parlamentario como un reto cu perspectiva y nos pais hunto cu su profesionalnan ta trahando duro na un forma responsabel pa recuperacion di nos pais y yega un finansa publico duradero. Alabes e mandatario ta desea Parlamento hopi sabiduria y energia positivo pa conhuntamente cu gobierno traha na progreso di nos pais Aruba.

Related posts

Parlamentario Richard Arends (AVP) Ni pueblo y ni comercio sa kico ta na caminda

EA News Author

Prome Minister Evelyn Wever-Croes: E di 4 edicion di maria college mavo su science fair

EA News Author

Sueann ras (MEP): “Enseñansa na Papiamento lo yuda cu progreso di Aruba”

EA News Author

Leave a Comment