Durante su prome bishita oficial di trabao na Hulanda, Minister di Husticia, mr. drs. Arthur Dowers, a tene diferente reunion strategico cu instancianan clave den e cadena hudicial Hulandes.
Na Gemeente Dordrecht, Minister Dowers a tene un dialogo constructivo cu Wethouder Marc Merx, unda nan a intercambia pensamento riba temanan crucial manera “Inzet handhaving y toezicht den espacio publico den Municipio”. E reunion a enfatisa e importancia di un acercamento integral pa mantene orden, siguridad y bienestar den nos barionan.
Ademas, na Den Haag, Minister Dowers a reuni cu sr. Pieter-Jaap Aalbersberg, Nationaal Coordinator Terrorismebestrijding en Veiligheid (NCTV). Durante e dialogo, a discuti entre otro:
* E situacion actual di menasa na Hulanda;
* Importanscia di capacidad pa un pais por recupera despues di un incidente;
* Cambio climatico como punto critico pa paisnan Caribense;
* E rol vital di confiansa y cooperacion firme entre servicionan den e cadena di siguridad.
Minister Dowers a subraya cu Aruba ta compromete pa sigui fortalece su posicion den Reino, a base di cooperacion mutuo, cambio di conocemento y desaroyo sostenibel den area di husticia y siguridad.
