E situacion na LAR ta sumamente penoso
Minister di Husticia, mr. drs. Arthur Dowers, a sigui cu su bishita oficial na departamentonan cu ta resorta bao di su ministerio. Un di e departamentonan cu Minister Dowers a bishita tabata LAR, un entidad esencial den e proceso di derecho pa clientenan di Gobierno.
Durante e bishita, Minister Dowers a expresa su preocupacion grandi pa e situacion actual den LAR. “E situacion na LAR ta sumamente penoso,” e minister a declara. “LAR ta consisti solamente di dos empleado cu ta encarga cu e parti operacional y tres trahado den e parti administrativo. E capacidad di e departamento pa cumpli cu su obligacion legal ta severamente limita. Mester reevalua urgentemente con e departamento por sigui opera efectivamente.
Minister Dowers a enfatisa cu lo tuma paso inmediato pa mira kico ta posibel pa reduci e presion riba e personal limita. Lo sondea e posibilidad pa reevaluacion di cierto casonan, cu por ehempel un departamento manera DIMAS a nenga, y unda por, alivia e presion di trabao riba LAR. Mester tuma un rol mas activo pa yuda e departamentonan y evita acumulacion innecesario di presion cu e sistema no por carga.
Minister Dowers ta lamenta e estado fisico di e edificio y e falta di atencion cu LAR ta sufri. E recorte den personal den varios departamento y falta di reemplaso na momentonan crucial, manera ora cu hende ta baha cu pension of ta retira, ta un manera irresponsabel di maneha e departamentonan publico.
