PoliticaFeaturedLocal

Minister Endy Croes: Laga nos inculca den nos yiunan e balor grandi di Status Aparte y e lucha di Betico Croes

Minister Croes

Minister di Enseñansa y Deporte Endy Croes ta felicita henter pueblo pa cu e dia Nacional cu nos ta celebra 25 di januari esta Dia di Betico.

 

Ken ta Betico?:

Betico Croes a nace  25 di januari 1938 y si Betico tabata na bida e lo a cumpli 84 aña di edad. Betico a bin di e pueblo humilde di Sta Cruz y ta yiu di Panchico y Mimita (def).  Betico tabata felizmente casa cu Glenda y e matrimonio aki a produci 4 yiu esta Gisette, Glenbert, Junior y Glendeline (Lalo). Nomber corecto di nos Libertador Betico Croes ta Gilberto François ( Betico) Croes. Betico tabata gusta deporte y musica. No solamente Betico a dirigi koor di Santa Cruz Maria Inmaculada Santa Cruz pero Betico tabatin su propio grupo esta Betico y su grupo cu ta pasa cas pa cas fin di aña tocando su acordeon y dande. Despues cu Betico a fayece e grupo a cambia di nomber y a bira Grupo di Betico. Betico a bay scol basico y a continua HBS na St. Dominicus College. Betico a sigui su estudio na Hulanda na Hilversum y a bira maestro di school. Betico a regresa Aruba y a traha na Sint Jozef School esta Colegio San Hose pa 6 aña. Betico a sigui studia y a haal LO den Handelskennis y LO Spaans. Betico dspues a traha 2 aña na Colegio San Antonio na Sta Cruz di 1965 pa 1967.

 

Betico su amor pa Aruba:

Betico tabatin un amor pa Aruba inmenso y a dicidi di subi lista politico pa duna aporte na su pais di un otro forma. Betico na 1971 a kibra cu AVP y 9 di Februari 1971 a lanta su propio partido Movimiento Electoral di Pueblo (MEP). Su determinacion ta pa saca Aruba for di constelacion Antiyano cu e momento ey tabata 6 isla unda e isla mas grandi cu ta Curaçao tabata esun dominante. Betico a bringa y lucha pa esaki esta pa nos Status Aparte. Un lucha incansabel di 15 aña prome cu Betico a logra. Sinembargo e lucha no tabata facil.

 

Algun parti di e lucha:

Na augustus 1962 Betico a forma parti di delegacion di Reino pa bay Surinam. Betico a planta bek e idea di Status Aparte pero lamentablemente otro politiconan a bisa cu Betico no por papia den nomber di Aruba como cu MEP e tempo ey a saca 7 asiento den su prome salida y Betico ta representa 7 asiento. Betico a bisanan ‘Mi ta bay bek consulta cu mi pueblo y lo mi bolbe’. Dia 18 di maart 1973 Betico a organisa un manifestacion masal den Wilhemina stadion momento parlamentarionan Hulandes tabata na Aruba cual tabata un impacto enorme.

 

Betico a unifica pueblo cu Himno y Bandera:

Den e proceso Betico a boga pa union pa asina henter e pueblo por sostene e lucha. Betico a forma un comision pa Aruba por haña su propio bandera y himno. Dia 18 di maart 1976 nos bunita bandera a bay halto den Wilhemina stadion y nos himno Aruba Dushi Tera a resona. Esaki a crea un impacto di orguyo den nos Arubianonan unda mas y mas hende cu un amor patria a acerca pa sostene e lucha di Status Aparte.  25 di maart 1977 a organisa un Referendum pa pueblo mes por dicidi su futuro a traves di  Voz di pueblo ta voz di Dios. ( Vox Populi, Vox Dei). Lamentablemente AVP cu su lider nobo e tempo aya Henny Eman a pidi tur hende pa NO bay vota pidiendo tur hende pa bay lama e dia ey. Pueblo a reacciona masalmente cu 82.5% di voto na fabor pa Status Aparte. Aprobando di e manera aki e lucha di Betico cu un sosten incondicional.

 

Augustus scur na aña 1977:

Na aña 1977 MEP a obtene 5 di e total di 8 asientonan pa cu Parlamento di Antias durante eleccion.  Lamentablemente Gobierno Central a yuda pa PPA e tempo aya a laga MEP for di gobierno. Esaki a trece cune un ola di manifesto cu a desemboca den augustus scur momento cu WEB a cay afor y Aruba den pleno Blackout mester a manda refuerso di Riot Comando di Curaçao pa purba trece trankilidad. Tironan a cay riba nos hendenan cual tambe ta forma parti historia. Riot Comando hasta a drenta cas di mayornan di Betico na Sta Cruz na un manera inhusto pero e lucha a continua. Na 1978 Betico ta wordo encarcela pa 7 dia momento a haña un revolver bou di asiento di su auto mientras nunca por a prueba cu ta di dje. Pueblo a compaña Betico hibe prizon pero manera e mes a bisa semper e lucha ta continua.

 

Aruba ta logra Status Aparte:

Dia 12 di maart 1983 durante conferencia di mesa redonda na Den Haag Ruud Lubber a expresa na final e palabranan historico ‘ De Kogel is door de Kerk’. Akinan Betico y delegacion den nomber di Aruba a logra convence e Hulandesnan y Aruba a haña su Status Aparte entrente 1 di januari 1986 y pues tabatin 3 aña pa prepara esaki.

 

Betico ta wordo tira:

Dia 24 di april 1983 Betico yegando veld di Nadi Croes/Crismo Angela (veld di Winston antes) a wordo tira pa un agente policial. Masa y pueblo a bay for di control. A hiba Betico Merca y despues di varios operacion Betico ta recupera y ta sigui cu e lucha. Finalmente dia 31 di december 1985 rond 9pm anochi pues 3 ora prome cu aña nobo unda nos mester celebra e logro di Betico su lucha Betico ta accidenta bay 11 luna den coma y ta fayece na Hulanda na un edad di 48 aña y nunca a biba pa mira su propio lucha wordo cristalisa.

 

Betico a laga logronan grandi atras:

Betico cu Status Aparte a logra pa Aruba tin su propio Gobierno, Parlamento, Gobernador, Procurador General,, Banco Central, Moneda, Himno, Bandera, Ortografia. Pues a laga un herencia valioso pa nos y manera el a bisa na su yegada di Hulanda. Dia cu nos Status Aparte mester wordo menasa esaki lo significa guera.. Danki Betico y ban celebra dia di Betico y traspasa e historia pa nos futuro generacionnan.

 

Related posts

Workshop specialmente pa educadornan pa trata cu adulto mayor den enseñansa

EA News Author

Minister Thijsen a papia cu President di Comicion di Asuntonan di Reino di Staten

EA News Author

Minister Endy Croes a bishita Scol Basico Colegio Hilario Angela

EA News Author

Leave a Comment

Whatsapp Message