Diahuebs den ora tempran di mainta Minister Endy Croes a bishita Arco Iris Kleuterschool en conexion cu celebracion di 25 aña di servicio di juffrouw Mariebelle Arends y juffrouw Nyree Hart. E mainta festivo a inicia cu himno di Arco Iris Kleuterschool canta pe alumnonan, sigui pa palabra di bon bini pa cabesante di scol juffrouw Nelly Orman – de Cuba. Director di DPS sr. Ivan Croes tambe a hiba palabra ne ocasion special aki. Minister di Enseñansa a felicita y gradici e dos docentenan den nomber di Gobierno di Aruba y Ministerio di Enseñansa y Deporte alabes a haci entrega di un reconocemento di aprecio y gratitud na e juffrouwnan. Mandatario di Enseñansa a enfatisa cu e ta hopi orguyoso di e docentenan cu a dedica gran parti di nan bida pa educa nos muchanan. Danki pa boso dedicacion y profesionalismo den enseñansa na Aruba. E dignatario a expresa cu ta remarcabel y no ta comun ta cu ambos docente a cuminsa nan carera na SETAR despues nan a bay IPA, nan a stage na Arco Iris Kleuterschool y nan a keda traha na e scol pa 25 aña.
Un poco di e trayecto di juffrouw Nyree Hart
Dia 13 di januari 1997 sra. Hart a drenta den servicio di Gobierno na SETAR. Na augustus 1998 a habri oportunidad bay IPA cu studieopdracht. Na aña 2001 juffrouw Nyree a pasa su stage na Arco Iris Kleuterschool y na 2002 a gradua como maestra specialisacion 4-8 aña. Despues di su stage juffrouw Nyree a keda traha te awe na su scol stima Arco Iris Kleuterschool. Dia 13 di januari 2022 juffrouw Nyree a cumpli 25 aña di servicio.
Trayecto di juffrouw Mariebelle Arends
1 di februari 1996 sra. Arends a drenta den servicio di Gobierno na SETAR y 6 luna despues a bay IPA. Na aña 1999 Mariebelle a gradua como maestra specialisacion 4-8 aña. Dia 1 di augustus 2021 juffrouw Mariebelle a cumpli 25 aña di servicio.
Finalisando mandatario di Enseñansa ta gradici e docentenan y famia cu ta sostene nan durante henter e trayecto aki. Masha pabien!
