A duna un bista financiero/economico di Aruba y a indica unda Aruba ta para den e aña di conmemoracion di 160 aña di abolicion di sclavitud den Reino Hulandes
Diasabra atardi Minister Maduro di Finansa y Cultura tabata invita pa e Genootschap Nederland Aruba (GNA) pa duna un discurso den cuadro di e ‘Herdenkingsjaar Slavernijverleden.’ Prome cu a bay riba e topico di e encuentro na ocasion di 26 aña di existencia di GNA, e mandatario a tuma tempo pa asina brinda algun informacion financiero y economico di Aruba, pa asina e publico presente por ta na altura di e recuperacion cu Aruba a conoce despues di e pandemia.
Aruba ta conoce un recuperacion grandi
Minister Maduro a splica cu turismo a aumenta, reformanan necesario a wordo introduci, debe relata na nos GDP a conoce un rebaho, deficit a bira surplus, credibilidad financiero a aumenta, evaluacion positivo cerca IMF y CFATF, y desempleo a baha na un nivel historico. Tur ta señalnan positivo di Aruba su recuperacion grandi despues di e pandemia cu tabata un sla basta duro pa Aruba.
Conscientisacion riba historia di sclavitud na Aruba
Pa locual ta e tema di ‘Herdenkingsjaar Slavernijverleden,’ Minister Maduro a splica kico tur Aruba a bin ta haci pa brinda informacion riba e topico di sclavitud na Aruba, cu pa largo tempo no tabata conoci of no tabata wordo papia di dje na Aruba. E mandatario a informa cu a crea un comision special cu a percura pa traha encuentro cu stakeholders, produci videonan y dialogonan informativo riba e topico di sclavitud na Aruba, cu e meta pa conscientisa riba e parti di e historia comparti aki den Reino Hulandes.
‘Strafrente’ ta un forma nobo di sclavitud
Durante su discurso e mandatario a expresa su decepcion pa e manera con di un banda dentro di Reino Hulandes ta brinda despensa pa e historia di sclavitud, pero di otro banda den e negosacionnan pa refinancia y paga bek e debe haci cu Hulanda pa sobrebibi e pandemia ta experencia un trato cu ta hiba nos bek 160 aña atras den historia, den e tempo cu e colonianan mester a produci ganashi. Minister Maduro a splica cu di parti di e departamento di BZK cu cual e team di Aruba a hiba negosacion, nan por a haci miho cu duna un interes di 6.9% cu a lo largo di e 20 añanan cu Aruba ta haya pa paga e debe, lo resulta den un ganashi di 300 miyon florin riba cabes di e Pueblo Arubano. Ta trata aki di un yudansa pidi basa riba articulo 36 di Statuut den tempo di un pandemia y duna un ‘strafrente’ pa esaki no ta un trato cu ta refleha un despensa y ta mas bien un forma nobo di sclavitud.
Despensa ofreci ta perde su balor
Minister Maduro a recorda esnan presente riba e reaccion di Prome Minister sra. Evelyn Wever-Croes riba e despensa ofreci pa sr. Mark Rutte den nomber di Estado Hulandes dia 19 di december 2022 cu ta bisa, ‘een welgemeend excuus is altijd welkom.’ Cu e trato cu Aruba a haya den e negosacionnan pa refinancia e debe di e pandemia y e ‘strafrente’ duna, e esencia di e despensa ta perde su balor.
Ta para tur trabou ‘tot nader orde’
Na final di e discurso Minister Maduro a informa esnan presente cu Ministerio di Finansa y Cultura lo no forma parti mas di e agenda pa conmemora e abolishon di sclavitud den Reino Hulandes. Ta para tur trabou ‘tot nader orde.’ Motibo principal pa esaki ta e manera di trata cu otro den e negosacionnan pa refinancia e debe di e pandemia, y e ‘strafrente’ di 300 miyon florin cu e Pueblo di Aruba ta haya pa paga pa un yudansa basa riba articulo 36 di Statuut.
Apelacion pa reflexion
Minister Maduro a finalisa su discurso cu un apelacion pa un reflexion profundo den Reino Hulandes pa asina realmente nos por sana di e pensamento y trato cu a hiba na tanto falta di respet y comprension. E mandatario a gradici e Genootschap Nederland Aruba pa e espacio pa por a trece informacion balioso dilanti cerca nan miembronan cu ta hiba Aruba semper den nan pensamento y curason.
