Un ruta pa cera conoci cu e historia di e bario di Eagle, e refineria di Eagle y Aruba su rol importante pa aliadonan den Segunda Guera Mundial
Diabierna anochi Minister Maduro tabata tin e placer di haci e desvelo di un proyecto cultural e ‘Ruta Historico di Eagle’. E ta un proyecto iniciativa di Stichting Monumentenfonds Aruba hunto cu studiantenan di Hogeschool van Rotterdam SUS Atelier, Glen Gorddijn y e studiante Ricardo Arends, cu ta conta e historia di e di dos refineria di Aruba, Arend Petroleum Company conoci como Eagle Refinery, e bario di Eagle y Aruba su rol importante pa aliadonan den Segunda Guera Mundial.
Pa e ocasion aki Minister Maduro a conta un tiki di e historia di e bario di Eagle. Den comienso di
añanan 20, Aruba a conoce dos refineria. Na aña 1924 a establece Lago Oil & Transport Ltd y despues na aña 1927 De Arend Petroleum Maatschappij. Dos refineria cu tabatin un rol masha importante den Segundo Guera Mundial, ya cu nan tabata suministra petroleo na e aliadonan. Ta di e refineria ‘Arend’ e vecindario aki a haya su nomber ‘Eagle’ y tambe nos ‘Eagle Beach’.
Minister Maduro a comparti un tiki historia: “E refineria Eagle aki a duna trabou na mas cu shete mil trahado di 58 diferente pais. Den e area aki, e refineria a traha e fabrica pa refina e petroleo, un laboratorio y un brandweerkazerne. Tambe nan a construi nan sede ‘hoofdkantoor’ cu ta exactamente e edificio caminda nos ta para actualmente”. E mandatario tambe a trece dilanti cu e refineria a construi casnan special pa e personal di refineria, algun cas den e bario, e Eagle tennis club y e hospital cu tey ainda.
Pa Minister Maduro e historia di refineria tin un conexion personal cu su persona, mirando cu ela lanta den bario di Playa Pabou y e cas di su mayornan ta pega net na e tereno di e refineria Eagle. Segun e mandatario su tata den feliz memoria, a conte cu e pilarnan di nan cas, ta traha riba e stacanan cu ta marca e tereno di e refineria. Ademas e ta corda e palabranan di su mama, tempo cu e tabata mucha, cu ora un persona puntre na unda e ta biba, su mama tabata asina orguyoso di su bario y tabata responde na ‘Eagle High’.
Aruba tabatin un rol importante den Segundo Guera Mundial cu e dos refinerianan aki cu Alemania tabatin wowo riba Aruba y nan a manda un submarino pa bin destrui e dos refinerianan aki pa stroba e aliadonan haya nan combustibel. Asina e submarino a tira riba e tankero Arkansas y a mata varios hende entre otro Bonerianonan. Tambe e submarino a manda torpedo pa destrui e dos refinerianan cu danki na nos Señor Dios esakinan a faya nan proposito.
Segun e mandatario na aña 2018 ela ricibi un invitacion di Stichting Monumentenfonds Aruba pa un presentacion di un grupo di studiante di Hogeschool Rotterdam cu den apenas 2 siman di tempo a sa di investiga, inventarisa y indica e sitionan den e area di Eagle cu ainda ta visibel al igual cu esnan cu no tey mas y crea un ruta historico cu e meta pa rebiba e historia practicamente lubida di e area di Eagle. Despues di algun aña di trabou duro y perseverancia a logra pa realisa e bunita proyecto aki cu ayudo financiero di Vfonds. E proyecto di ‘Eagle History Tour’ sigur ta di sumo importancia mirando cu esaki lo ilumina parti di nos pasado, educa y alabes honra e sacrificio haci durante un di e capitulonan mas scur den nos historia. E no ta trata solamente di edificionan y obhetonan pero di conmemora e victimanan di di dos Guera Mundial.
E storia di e refineria di Eagle, un tempo simbolo di e poder industrial di Aruba hunto cu Lago na San Nicolas, ta conta nos e desaroyo di Aruba den tempo for di su comienso na 1924 te na e desmantelamiento den añanan cincuenta y sesenta caminda cu a traha espacio pa turismo cual te cu awe en dia ta e pilar economico mas importante di Aruba.
E proyecto di ‘Eagle History Tour’ lo crea un conexion entre e historia, herencia cultural industrial di Aruba y nos turismo, creando un atractivo nobo pa nos bishitantenan pero tambe lo educa localnan y principalmente e generacionnan mas jong tocante Aruba su historia industrial y e rol importante di e refineria di Eagle den e di Dos Guera Mundial asina e mandatario a trece den su discurso. Ademas den un futuro cercano lo pone borchinan na cinco diferente sitio cu QR code cu ta contene informacion importante di historia di e sitio den cuatro diferente idioma, mas obhetonan di arte y programanan educativo.
Minister di Cultura ta invita comunidad henter, pa bishita e Tour Historico di Eagle. E ta un bunita oportunidad pa den famia, excursion di scol of di scouting, gruponan social, pa participa na e Tour aki pa asina siña conoci cu e parti di historia di Aruba su rol den Segundo Guera Mundial.
Den nomber di Gobierno y comunidad di Aruba, Minister Maduro a expresa palabra di gradicimento na tur instancia local cu a uni y nan cooperacion pa e proyecto aki por a bira realidad y muy especial special na e team di Stichting Monumentenfonds Aruba, señor Glen Goddijn, Stichting Dutch Heritage World Tour, e studiantenan di Hogeschool Rotterdam SUS Atelier y studiante Ricardo Arends pa e bunita iniciativa aki cu ta di gran balor historico cultural pa Pais Aruba.
Aruba, pabien cu otro bunita herencia cultural pa nos por conserva, experiencia y biba nos cultura historico.
