Recientemente Minister Maduro a haya confirmacion di e Director General encarga cu Aduana na Hulanda, sra. Nanette Schelven, cu Aduana Hulandes lo yuda Aduana Aruba cu asistencia tecnico pa fortifica y profesionalisa Aduana di Aruba. E asistencia ta wordo brinda dentro di e programa di ‘Versterking Grenstoezicht’ y sr. Jan Kamp kende ta un experto di Aduana Hulandes cu experiencia amplio a keda asigna pa brinda e asistencia necesario na e team di maneho di Aduana na Aruba.
Sr. Kamp ta un Aduanero Hulandes cu recientemente a hubila, pero cu a keda traha riba proyectonan pa Aduana Hulandes. Como Aduanero, sr. Kamp tabata na cabes di Aduana na Schiphol y tambe a lidera e Cuerpo di Aduana na e waf di Rotterdam. Den añanan 90 sr. Kamp a traha pa un par di aña tambe na Aruba y pesey ta conoci cu nos isla y Aduana di Aruba caba.
Dialuna cu a pasa Minister Maduro a reuni cu sr. Kamp pa asina repasa e necesidad cu tin na Aduana y tambe pa repasa e trabounan cu e mandatario lo kier mira realisa na Aduana Aruba a corto y mediano plazo. Puntonan cu a bin dilanti den e reunion ta, entre otro, e ley di ALDA cu mester keda introduci a corto plazo pa asina modernisa e trabounan na Aduana. E edificio nobo di Aduana cu tambe mester keda cla mas pronto cu ta posibel. Banda di esaki a toca e necesidad pa Aduana por conoce e formacion, ekipo y profesionalismo necesario pa por traha na un manera mas eficiente pa por atende cu e retonan cu e Aduana di un isla manera Aruba ta confronta y mester surpasa.
Den e dos prome simannan di januari ya caba sr. Kamp a cuminsa hiba e combersacionnan necesario cu diferente persona den Aduana pa asina por haya un bista y compila un lista di e retonan cu Aduana tin, pa despues por traha un plan di mehoracion pa wordo ehecuta a corto y mediano plazo pa fortifica y profesionalisa e organisacion di Aduana na Aruba.
Minister Maduro ta gradici sr. Kamp pa a acepta e reto pa brinda asistencia na e team di maneho di Aduana na Aruba, y ta mira dilanti riba un bon cooperacion na bienestar di e Cuerpo di Aduana y di Aruba.