Extra surplus ta wordo uza pa baha debe y pa haci extra inversion conforme reglanan presupuestario
Aña pasa na september 2022, Minister Maduro di Finansa a expresa cu Presupuesto 2023 ta uno historico ya cu e ta e prome presupuesto cu despues di 15 aña di tempo ta wordo entrega na tempo, y ta e prome presupuesto cu despues di hopi aña ta bay conoce un surplus. A medida cu e aña ta pasa por mira cu Presupuesto 2023 ta cambia e rumbo den finansa publico na Aruba den cual un maneho financiero serio ta resalta y ta resulta den extra surplus ta wordo uza pa baha debe y pa haci extra inversion conforme reglanan presupuestario.
Presupuesto 2023 ta conta cu 3 novum
Maneho financiero serio a hiba na mehoracion di e ciclo presupuestario di Pais Aruba. Asina nos por mira cu den Presupuesto 2023 tin 3 novum, pa prome biaha tin un surplus despues cu Aruba a conoce deficitnan grandi, a introduci un ‘Nota di Comienso di Aña’ pa asina Parlamento hopi tempran den aña por tin un bon bista di cambionan den ehecucion di e Presupuesto 2023, y ta aplica pa prome biaha e maneho di ‘meevaller,’ den cual e resultado financiero riba e surplus di 1% di GDP por wordo destina 50% pa paga debe y 50% pa extra inversion. Ta cambionan grandi cu a wordo logra debi na trabou serio den ekipo y na un manera structura.
Un surplus mas grandi cu 1% di GDP
Den aña Presupuestario 2023 ta prome biaha despues di hopi decada cu ta logra un surplus den un presupuesto di Pais Aruba. E resultado financiero ta hiba na un surplus di 1.8% di GDP cu ta 0.8% mas cu e 1% di GDP cu a keda acorda como norma financiero pa aña 2023. Conforme e Protocol entre Aruba y Hulanda di aña 2018 cu ta contene normanan financiero pa yega na un finansa publico sostenibel, tur resultado financiero cu ta riba e surplus di 1% di GDP, por wordo uza 50% pa paga debe y 50% pa haci extra inversion. Esaki ta wordo yama e maneho di ‘meevaller.’
E maneho di ‘meevaller’
Den Presupuesto 2023 ta e prome biaha cu e maneho di ‘meevaller’ ancra den e Protocol di aña 2018 entre Aruba y Hulanda pa yega na finansa publico sostenibel, ta wordo ehecuta. Esaki ta significa cu e resultado financiero riba e surplus di 1% di GDP por wordo uza 50% pa paga debe y 50% pa inversion. E resultado ta 1.8% di GDP, pues di e 0.8% cu ta ekivalente na 50.2 miyon florin, e mita cu ta 25.1 miyon florin por bay na baha e debe di Pais Aruba, y e otro 25.1 miyon florin por bay na extra inversion.
Maneho structura di inversion
Gobierno ya caba pa 3 aña presupuestario ta trahando cu un lista aproba di inversionnan cu ta wordo selecta pa un Comision special di Departamento Economico y Departamento di Finansa. E Comision ta percura pa inversionnan cu ta bin na remarca pa wordo ehecuta, ta necesario, tecnicamente por wordo ehecuta y ta duradero. E 25.1 miyon florin cu ta bira disponibel conforme e reglanan presupuestario, lo wordo destina pa ehecuta 15 proyecto cu ta riba e lista di inversion cu a pasa e evaluacion di e Comision special di Departamento Economico y Departamento di Finansa. Door di atende na un manera structura cu e inversionnan necesario ta evita cu fondonan ta wordo destina na inversionnan cu ta ‘ad hoc’ of cu no ta contribui na e bienestar general di Pueblo di Aruba. Den Presupuesto 2023 y den e Nota di Fin di Aña 2023, tin e listanan di e inversionnan cu por wordo ehecuta cu e suma total di 47 miyon florin cu ta disponibel pa inversion den aña 2023.