Featured Politica

Minister Rudy Lampe : Parlamento a comete blunder ora cu a nenga pa independisa scolnan publico


Minister di enseñansa dr. Rudy Lampe e siman aki durante e conferencia di prensa di RED Democratico a papia di loke el a bin ta traha riba dje.

El a cuminsa pa splica cu partido RED dia 30 di mei lo cumpli 18 aña di existencia cu ta nifica “nos por asumi responsabilidad mas grandi pa e pais aki. Nos a demostra di no ta un partido aventurero, pero uno cla pa sirbi interesnan di Aruba.”

Tambe el a papia cu e siman aki ta lansa e programa informativo  PEN 2030 (Plan Educacion Nacional). E ta un programa unda expertonan local riba e tema aki lo conscientisa pueblo cu innovacion ta indispensabel. Pa e motibo aki tambe, e mandatario a bisa, cu e ta orguyoso cu RED tin tres candidato di e mundo di enseñansa, cu lo por comparti nan experticio cu pueblo di Aruba.

Un di e proyectonan cu ta pendiente pa e siguiente gobierno ta independisacion di scolnan publico. El a recorda loke cu a pasa den Parlamento na april, 2018 y cual e ta cataloga como un blunder di e organo aki. Den un sesion 20 parlamentario a vota contra independisacion di scolnan publico y solamente Ricardo Croes a vota na fabor di e conseho aki. “Awo a haya rapport di Departamento di Recurso Humano cu ta mustra cu e departamento di Scolnan Publico ta un caos. Si Parlamento tres aña pasa a tuma e decision corecto, e interes di e maestronan lo tabata miho sirbi. Centenares di dossier di personal di scolnan publico (docentenan) no ta actualisa. Pa motibonan politico Parlamento a bay contra, sin preocupa cu interes di e maestronan. Un docente (maestro) satisfecho, ta sirbi nos muchanan di un miho forma,” e mandatario a bisa.

Esaki ta hustamente loke el a propone na 2018, segun e mandatario. E sistema cu el a propone ta igual na tur parti di Reino Hulanda y cual pa motibonan politico a bay contra e proposicion aki. E ta lamenta cu hustamente docente y maestronan den Parlamento manera Jennifer Reyes, Marlon Sneek, Edgard Vrolijk y Sue Ann  Ras a bay contra su proposicion. Esaki mientras cu nan tur ta traha pa un Stichting y no den un Scol Publico.

“Nos ta spera cu pueblo duna apoyo na e maestronan riba lista pa traha pa mehora enseñansa na Aruba,” el a bisa.

E docentenan candidato ta Rene Kock, Shandy Dijkhoff y Sherwin Jacobs.

Related posts

MAVIS ta kumpli 50 aña den Medio i Komunikashon

EA News Author

Nos hobennan den Parlamento Hubenil ta determinando nan propio destino

EA News Author

Aruba y su turismo 1 aña despues di e prome casonan di covid-19

EA News Author

Leave a Comment