Dialuna 14 di april, Minister di Turismo, Transporte y Labor, mr. Wendrick Cicilia, a atende un reunion importante cu Mediado di Gobierno, Sr. Anselmo Pontilius. E reunion a concentra riba temanan clave pa e bienestar laboral y e futuro di mediacion na Aruba.
Durante e dialogo, a reconoce cu hopi di e leynan vigente, incluyendo e ley di referendum, ta di caracter anticua y ta contene aspectonan legal cu ta obstaculisa un implementacion eficaz. Minister Cicilia a enfatisa cu esakinan mester haya atencion prioritario, pa garantisa cu e ley y procedemento ta refleha e realidad actual di nos mercado laboral.
Mediacion: Un pilar pa progreso laboral
Bureau Landsbemiddelaar Aruba a demostra su capacidad y autoridad den maneho di conflictonan laboral y implementacion di ley, sirbiendo como un brug crucial entre dunadonan di trabao y empleadonan. E proceso di mediacion no solamente ta busca resolucion di conflicto, pero tambe ta crea un base di dialogo, cooperacion y respet mutuo.
Minister Cicilia a indica su compromiso pa fortalece e rol di mediacion den nos institutonan publico, cu e meta pa promove un cultura di solucion interno, formacion continuo y capacitacion pa empleadonan den sector publico.
Un futuro moderno y eficiente
Durante di e reunion, a trata e situacion urgente di e mercado laboral, incluyendo e scarcedad di empleado y e necesidad urgente pa modernisacion. Minister mr. Wendrick Cicilia ta reconoce e trabao impresionante cu e mediado saliente a haci durante mas di 10 aña y ta ansioso pa traha di cerca cu e mediado nobo, cu su nombracion ya ta den proceso na Departamento di Recurso Humano (DRH). Ta di sumo importancia pa Minister mr. Wendrick Cicilia tin un relacion estrecho cu e Mediado di Gobierno nobo pa continuidad di e trabao vital cu e instituto ta realisa.
Minister Cicilia ta comprometi pa sigui traha na un solucion sostenible, den colaboracion cu tur sector relevante, pa crea un ambiente laboral husto, moderno y productivo pa tur esnan cu ta forma parti di e mercado laboral na Aruba.