Minister di Vivienda Publico, Planificacion Teritorial, Medio Ambiente y Infrastructura (VROMI), Honorabel Patrice Gumbs, hunto cu e ekipo di proyecto di Oficina di Nacionnan Uni pa Servicionan di Proyecto (UNOPS), a reuni cu un representante di Dutch Quarter Community Council. E meta di e reunion tabata pa duna actualisacion riba e proximo proyecto di sanacion den e area.
Enfatisando e compromiso cu un enfoke participativo y involucracion di comunidad, Ministerio di VROMI y UNOPS a organisa e sesion informativo aki pa informa e conseho riba e actividadnan di e proyecto. E reunion aki ta e prome den un serie di iniciativa diseña pa fomenta participacion continuo di e comunidad durante henter e ciclo di e proyecto.
E Proyecto di Sanacion, lidera pa Ministerio di VROMI, lo inclui construccion di un red di coleccion di riolering, un sistema di drainage pa awa di yubida, y conexionnan pa hogarnan. Tambe e lo inclui reparacion di camindanan afecta pa e trabounan aki. Financia pa un inversion di €5.6 miyon di Union Europeo y implementa pa UNOPS, e proyecto lo afecta directamente rond di 500 hogar. E iniciativa aki ta marca un paso importante den mehoracion di salud publico, proteccion di medio ambiente y condicionnan di bida pa e comunidad local.
Discusionnan durante e reunion a enfoca riba e bista general di e proyecto, su alcanse, obhetivonan y e cronograma. E participantenan a explora tambe e metodonan mas efectivo pa comunica cu e comunidad mas amplio di Dutch Quarter, prestando atencion special na e leccionnan siña for di iniciativanan di sanacion anterior den e area. E enfoke aki ta refleha e obhetivo principal di e proyecto: entrega infrastructura cu ta apto pa su proposito y cu ta beneficia e residentenan directamente.
Relaciona cu esaki, comunidad ta wordo recorda cu UNOPS lo host un sesion informativo di compra (procurement) riba 21 di April pa 10:00 AM. E webinar aki ta specialmente pa compañianan di construccion cu experiencia den sanacion na Sint Maarten, como tambe firmanan di ingenieria y consultoria. Interesadonan por tuma contacto via sint.maarten@unops.org pa registra.