CuracaoFeaturedInternacional

Mirando e situashon entre Venezuela i Guyana: Mester evita situashon di guera den karibe

Giselle Mc William

Frakshon di MAN a tuma nota di e huiso resien di ICJ (Korte di Hustisia Internashonal) den e disputa rondó di Essequibo, den kua e ta instruí Venezuela pa no tuma akshon pa kambia frontera ku Guyana. Tambe nos a tuma nota ku no opstante e huisio aki,  Venezuela sigui ku un referèndum riba e disputa i a deklará ku e resultado di referèndum ta,  ku Venezuela mester aneksá Essequibo i hasta a krea un estado nobo riba e teritorio di Guyana. Ademas nos a tuma nota di e mobilisashon di Brasil pa protehá su frontera kontra invashon di Venezuela pa atraves di teritorio Brasileiro purba aneksá Essequibo, Guyana. 

Mas aleu nos a tuma nota di e posishonamentu di Estados Unidos(Merka) na banda di Guyana. Ku e tur posishonamentunan aki, guera ta un posibilidat real den region. E menasa aki ta e motibu ku Nashon Uni a yama un reunion di úrgensia awe djabièrne riba e posishonamentu di Venezuela.

Den un karta ku Frakshon di MAN a manda pa minister president nos a hasi e siguiente preguntanan

  1. Kiko ta posishon di Kòrsou komo un di e 4 paisnan ku ta forma Reino Hulandes, pa yega na un posishon di Reino, den bista di posishonamentu di Venezuela pa ku Guyana riba e area di Essequibo? 
  2. Nos a eksperensiá kon un guera te na Ukrania ta influensia kosto di bida den nos pais. Kon i kiko Kabinete Pisas a prepará pa Kòrsou por atendé ku un eventual  guera den region? Esaki no solamente riba e area di responsabilidat konhuntu di Reino pa defensa; pero mas aun e responsabildat outonomo pa atendé ku konsekuensianan sosial i ekonomiko pa pueblo di Kòrsou?
  3. Minister- Presidente komo minsiter presidente di Kòrsou, por duna finalmente posishon di su kabinete riba e situashon aki?

Nos ke atvertí kabiente Pisas for di awor pa no sinta ketu, pero informá e kabinete Hulandes i Gobièrnu di Reino for di awe, ku e lo formulá nos posishon komo Kòrsou ya ku un guera den Karibe, ta un guera den nos kura!

Frakshon di Partido MAN ta disponibel pa un reunion di úrgensia 24 ora, shete dia pa siman riba e menasa real aki.

Related posts

Yuda Rotaract cu nan proyecto annual “Un P’ami, Un P’e” cu e meta pa colecta producto higienico pa 188 di nos grandinan

EA News Author

Maneho pa tin cifranan registra na KPA ta un prioridad

EA News Author

Centro di Bario Savaneta ta celebra Dia Internacional di Derecho di Mucha

EA News Author

Leave a Comment

Whatsapp Message