El a drenta c’un arogancia y nunca realmente a forma parti di gobierno di coalicion
Diahuebs ultimo un biaha mas gobierno a mustra Minister Marisol Lopez Tromp, cu e no ta bon bini mas den seno di gobierno na mando y cu e momento a yega pa e compronde esaki.
For di momento cu Marisol a asumi responsabilidad di e cartera di infrastructura, a surgi problemanan serio, ya cu e minister a presenta un grado halto di arogancia, compaña pa un actitud cu ta su so ta manda y cu ningun hende por bise kico pa haci.
E actitud arogante aki tabata manera un forma pa expresa cu e tin un poder awor pa haci loke cu e kier pero dentro di esaki, Marisol a lubida cu e tin un pasado tambe ainda pa aclaria, manera e brug di Madushi na Noord.
For di prome dianan caba na mando como minister, Marisol a cuminsa punta dede, saca conclusionnan contra hendenan cu a gosa di confiansa pa un bon tempo pero sin cu nunca el a presenta un solo prueba concreto di tur loke el a bin ta bisando.
Na varios ocasion otro coleganan minister a yega di papia cu su persona, yega na cierto palabracionnan pero na final di dia Marisol a dicidi cu e ta haci loke cu e kier y con cu e kier y ningun hende tin algo di bise of reclame.
Sinembargo e rol aki tabata hopi controversial ya cu den ultimo eleccionnan, Marisol a perde hopi credibilidad cerca pueblo votado, caminda el a cambia tres partido caba y den dos di su ultimo escogencianan, Marisol a cay barbaramente den popularidad perdiendo hopi voto den eleccion di 2017.
Sinembargo pa medio di su partido POR el a logra di drenta gobierno y despues bira minister pero a bin resulta cu Marisol a forma un gobierno dentro di un gobierno, ultimo tempo tabata mustra intransigente ora cu tabata trata di e asunto di tiradonan di pisca.
El a trata di bolter e asunto riba su dos otro coleganan pero en realidad Marisol a hunga un rol hopi dudoso den henter e proceso pa regla e asunto di spearfishing.
Den henter e asunto di spearfishing Marisol a papia di destruccion di koraal, sin bisa cu practicamente no ta haya koraal na 40 pia di profundidad pero pa un motibo of otro, Marisol a sigui pone pia duro loke ta bolbe confirma di con el a haya problema den e ultimo tres partidonan politico di cual el a forma parti.
Diahuebs un biaha mas Marisol a haya un notificacion bon cla di e actual coalicion caminda el a ser mustra cu e nota welkom mas den gabinete Wever Croes y si e tin algo di decensia, e lo hala atras, entrega si retiro como Minister y soluciona un situacion cu lo no wordo soluciona si e mes keda como Minister.
Aruba ta pasando den temponan dificil, ta confrontando diferente crisis pero ainda Marisol ta kere cu e por sigui insisti pa keda Minister den un gobierno cu no kier traha cune mas y cu e momento a yega pa e tuma su retiro como mandatario.
Notabel ta cu den transcurso di añanan y di cada partido cu e la subi daño y distruccion so e la comete….minister marisol Lopez Tromp ta conoci di ta un bon gañado y manipulado …. ehempel bibo ta cu tempo e tabata presidente di parlamento a gaña cu ex parlamentario a dal e, hasta a bay duna aangiffte falso a bin resulta den e investigacion. Pa e actitud aki mes awo ningun partidono kier traha cu ne, gobierno den cualicion 7 minister a firma nan no tin confiansa den dje y awo mas ainda parlamento di Aruba e organo di mas halto no ta confia minister marisol lopez tromp y a pone un mocion di desconfiansa pa e bay cas.
Sinembargo no ta nada straño cu e mandatario no kier compronde cu e no ta bon bini mas den gobierno. Esaki ta prome biaha den historia di Aruba cu su partido, su gobierno y su fraccion y e fraccion di mas grandi den parlamento no ta confia minister marisol lopez tromp. Esaki ta lanta hopi stof di kico por ta e motibo cu e mandatario no ta tuma honor na su mes , pero ta chancla mane un carpata na e posicion di minister di infrastructura cu ya caba den pasado a fungi como minister di infrastructura y cu tabatatin hopi cuestionamento den su maneho. Kico ta pone cu e mandatario no kier laga e cartera tan gusta ?