Ladronisia na vehíkulo
Djadumingu 17 di ougùstùs a drenta keho di ladronisia na un outo ku tabata stashoná banda di un kasita di bewaker, na un akomodashon turístiko situá na Bulevar Julio A. Abraham. Deskonosínan a kita spil di pafó na banda robes di un Hyundai i10 i a bai kuné. Ta investigando e kaso.
Polis ku èkstra supervishon den Kralendijk
Den e último fin di simannan, polis a patruyá i tene supervishon èkstra den Kralendijk en konekshon ku molèster di bròmer i motosaikel, i fivermentu na altura di Kaya Grandi. E akshon aki a yuda pa minimalisá e molèster.
Durante di e supervishon polis a duna atvertensia na shofùrnan di skuter pa kore sin hèlm bistí. Tambe a papia ku vários hóben riba nan komportashon ku e-bikes, manera kore sin lus i imprudente entre outonan. Tambe a aktua kontra stashonamentu riba asera.
KPCN ke enfatisá ku e komportashon aki tin atenshon i lo atendé di manera estrikto ku e komportashon aki. Si ta nesesario, lo tuma medidanan ku ta kuadra òf duna but. Komo ku mayoria biaha ta trata di muchanan menor di edat, KPCN ke hasi un apelashon na mayor(nan) tambe pa papia ku nan yu(nan) tokante nan komportashon den tráfiko i e posibel konsekuensianan ku esaki por trese kuné.
Detenshon pa maltrato
Djadumingu 17 di ougùstùs, alrededor di 10.50 or di anochi, a detené un hòmber di inisial W.S.R.R. di 43 aña di edat na Kaya Haldu pa maltrato i maltrato severo. E sospechoso tabata enbolbí algun ratu promé riba e anochi den un bringamentu na Kaya Gristèlchi, di kua a maltratá e víktima severamente. Personal di ambulans a duna e víktima tratamentu médiko.
Detenshon pa menasa
Djadumingu 17 di ougùstùs, alrededor di 6 or di atardi, a detené un hòmber di inisial F.J.J.S. di 34 aña di edat na Washikemba pa menasa. Ta investigando e kaso.
Pikòp ta dal den kurá
Djadumingu 17 di ougùstùs, alrededor di 2.15 or di mardugá, ‘meldkamer’ sentral a risibí notifikashon tokante un aksidente ku herido riba Kaya Korona. Na e sitio a resultá ku un pikòp a dal den kurá di un kas i un bòrchi di tráfiko. Ambulans a transportá ámbos okupante pa hòspital pa tratamentu médiko. Pa e motibu aki no por a hasi un tèst di supla ku e shofùr. Polis a dirigí tráfiko temporalmente na e sitio, te na momentu ku e servisionan konserní a terminá ku nan trabounan.
A topa ku indokumentadonan
Djasabra 16 di ougùstùs un patruya a tene kòntròl debí na un akshon sospechoso. Na momentu ku e patruya a para na un snèk riba Kaya Avelino J. (Abechi) Cecilia, dos di e tres personanan sintá na un mesa a trata di kana bai for di e sitio. Polis a para nan i a pidi pa identifiká nan mes. Tur tres persona no por a identifiká nan mes. A hiba tur tres persona warda di polis i a entregá nan na e Departamentu di Supervishon di Estranhero (Vreemdelingen Toezicht) di KPCN. Despues di un investigashon mas aleu a resultá ku dos di e tres personanan tabata permanesé di forma ilegal riba nos isla. A hiba nan e Instituto Hudisial Hulanda Karibense (JICN) pendiente deportashon pa nan pais di orígen.
Aksidente entre outo i skuter
Djasabra 16 di ougùstùs, alrededor di 9 or di anochi, ‘meldkamer’ sentral a risibí notifikashon tokante un aksidente entre un outo i un skuter na altura di e krusada na Kaya Nikiboko Nort i Kaya Sonmontuno. E outo a lora dilanti di e skuter di kua a okashoná e aksidente. E shofùr di e skuter a resultá heridá i ambulans a transport’é pa hòspital pa tratamentu médiko. A duna shofùr di e outo but pa no ta den poseshon di un reibeweis bálido. Konforme e maneho di ‘botsen is blazen’ a hasi un tèst di supla ku ámbos shofùr, ku resultado negativo.
Atrako na sitio di sambuyá
Djasabra 16 di ougùstùs a drenta keho tokante un atrako ku a tuma lugá na e sitio di sambuyá ku e nòmber Andrea 2, situá na Crown Ridge, den Sabadeco. Un hòmber deskonosí a sorprendé un dama ku tabata drumi riba bich na e sitio aki i a eksigui’é pa duna sèn. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.