Detenshon pa manehá bou di influensia
Riba djadumingu promé di òktober, alrededor di 2 or di mardugá, a detené un hòmber di inisial J.W.M.E. di 41 aña di edat en konekshon ku manehá bou di influensia. E sospechoso tabata enbolbí den un aksidente riba Kaya Thomas M. Marchena. El a bai dal ku su outo den kurá di un kas. A hasi un tèst di supla ku e shofùr pa motibu ku e tabata papia ku lenga pisá, e tabatin wowo kòrá i e tabata hole alkohòl. En konekshon ku e resultado di e tèst di supla ku a hasi kuné, a detené e sospechoso pa manehá bou di influensia di alkohòl. E sospechoso no por a mustra un reibeweis bálido i a haña un but pa esaki.
Riba djabièrnè 29 di sèptèmber, alrededor di 5 or di atardi, a detené un hòmber di inisial B.C.W. di 55 aña di edat en konekshon ku manehá bou di influensia. E sospechoso tabata enbolbí den un aksidente riba Kaya Internashonal. A hasi un tèst di supla ku e shofùr pa motibu ku e tabata papia ku lenga pisá, e tabatin wowo kòrá i su aliento tabata hole alkohòl. En konekshon ku e resultado di e tèst di supla ku a hasi kuné, a detené e sospechoso pa manehá bou di influensia di alkohòl. A bai kuné warda di polis pa un análisis di rosea.
Búskeda di hòmber pèrdí un biaha mas sin resultado
Durante e último dianan a sigui ku búskeda di e hòmber pèrdí, Rodrigo Thode, bou di guia di Kuerpo Polisial Hulanda Karibense (KPCN) den kolaborashon ku e avion Dash i helikòpter di Wardakosta. E búskeda e tuma lugá riba djaweps, djabièrnè i djasabra den Rincon i den besindario di Onima, Morotin, Karpata, Santa Barbara i Sabadeco. A buska tantu den mondi komo na kosta. Lamentablemente, e búskeda no a duna resultado.
Riba djaweps 28 di sèptèmber alrededor di 11 or di mainta tabata e último biaha ku tabatin kontakto ku e persona aki. Na momentu ku Rodrigo a sali kas, e tabatin un karson kòrtiku koló blou i un blusa blanku ku blou bistí. Na pia e tabatin sandalia bistí. Ultimo informashon ku polis a risibí ta ku a mira un persona paresido na e deskripshon riba djaweps 28 di sèptèmber alrededor di 2 or di mèrdia den besindario di Kaminda Broertje Janga na altura di Sabadeco.
Polis ta keda ku debido atenshon pa e kaso i ta pidi kualkier persona ku por a mira òf tende algu, tin informashon òf sa paradero di Rodrigo Thode, pa tuma kontakto ku polis na 715 8000, 911 òf via e liña di tep anónimo 9310.
Kiebro den kas
Riba djasabra 30 di sèptèmber a drenta keho di kiebro den un kas situá na Lagun Hill. Entre 12 or di mèrdia i 2 or di atardi riba e mesun dia, deskonosínan a kibra i a bai ku vários artíkulo. Bou di esakinan tabatin entre otro un ‘bluetooth’ spiker koló pretu di marka Sony, un paña di sambuyá di marka Cressi, tipo Tokugawa, un snòrkel i su masker koló bèrdè skur di marka MARES, un oloshi di sambuyá koló ‘neon’ di marka Suunto, tipo Zoop, un kèts di marka Adidas koló blanku ku strepi blou skur i un faha. Ta investigando e kaso.
Aksidente
Alrededor di 4 or di atardi riba djabièrnè 29 di sèptèmber, un aksidente entre un outo i un pikòp a tuma lugá riba Kaya Internashonal na altura di e rotònde. Personal di ambulans a trata shofùr di un di e vehíkulonan enbolbí na e sitio mes. Dokumento di ámbos vehíkulo enbolbí tabata na òrdu.