Mi por a tuma nota ku e gabinete hulandés lo bai saka 15 mion euro pa asina por kompensá gastunan di energia ku kasimente ta bira impagebel. Ounke mi a tuma retiru temporal komo miembro di konseho insular mi ta sigui tur e desaroyonan i mi ta sumamentu kontentu ku e pueblo di Boneiru sigur sigur lo haña un alivio grandi. E lo no ta sufisiente mirando sierto situashonnan di famianan aki na Boneiru pero e ta un paso den un direkshon positivo.
No mas ku dia 13 di yüli 2022 gobièrnu di Boneiru a saka un dekreto pa ehekutá e supsidio energétiko pa kasnan di famia ku entrada abou i ku ta den un situashon vunerabel. Famianan ku ta bin na remarke pa esaki lo risibí un supsidio di 850 dòler den forma di krédikto serka e kompania di awa i elektrisidat ku ta WEB N.V. E minister enkargá ku energia ta menshoná ku a deliberá ku e gobièrnu di Boneiru i ku e supsidio ta bai direktamente pa WEB N.V. lokual ta den liña tambe ku e dekreto di gobièrnu di dia 13 di yüli 2022. Mi ta hopi kontentu ku tin un bon sinkronisashon entre e gobièrnu di Hulanda i di Boneiru ku den mi konsepto ta dunando su frutanan.
Un otro bon sinkronisashon entre Hulanda i Boneiru ta e resultado di e deliberashonnan entre e diferente ministerionan i gobièrnu di Hulanda ku a keda konkretisá dia 16 di yüni último. E palabrashonnan ku a keda konkretisá a keda tradusí den e di kuater kambio di presupuesto pa loke ta trata e aña aki i ku lo keda tratá dia 11 di òktober 2022 den konseho insular. Lo bin medionan disponibel pa e agènda soshal, ehekutashon di e desaroyo integral di Bario i fortifikashon di e forsa di ehekushon di nos aparato gubernamental entre otro.
No opstante e varios krisis mundial i lokal ku Boneiru a pasa i ta pasa aden, danki na un vishon kla i raspá di e gobièrnu aktual, a keda demonstrá ku gobièrnu ta apto pa goberná den situashonnan sumamente fèrfelu ku nos ta pasa aden.
Mi ta kontentu di konstatá ku gobièrnu di Boneiru a sa di mustra nos pueblo kiku nan tin derecho riba dje. E aktitut di ‘ta asina mes ta bon’ a kambia i mi ta apresiá ku nos pueblo sa su derechonan i no ta laga su mes keda manipulá mas polítikamente. Mi ta gradisí gobiernu ku e logro aki i mi persona komo miembro di MPB lo sigui lucha i èksigí di Hulanda pa tuma un posishon mas pro-aktivo riba tereno soshal i kombatimentu di probresa. E lucha ta sigui.