E sector di ATV y UTV na Aruba ta pasando den momentonan dificil, cu incertidumbre pa futuro di nan negoshinan. Segun Jimmy Douglas, representante di Aruba Ariba Tours, e problema principal ta e falta di comunicacion di parti di gobierno.
Nos no sa kico ta pasando, nos no sa,” Douglas a declara. E ta indica cu tin un preocupacion grandi debi na e falta di informacion, y ta señala cu e incertidumbre ta afectando e negoshinan severamente.
Douglas a subraya cu e preocupacion aki no ta politico, sino cu e ta un preocupacion comercial. E ta representa e fundacion “Off-Road Foundation”, cu ta comparti e mesun preocupacionnan. E ta mustra cu e decisionnan y e falta di claridad ta afectando nan famia y e futuro di nan negoshi.
Segun Douglas, nan ta perhudica pa motibo di e decisionnan rond di e ruta di “Light House”, cu ta un di e rutanan mas importante pa e tournan. Douglas a bisa cu nan tin contractnan cu crucero cu ta yega 2027, 2028 y 2030, y e cancelacion di e rutanan ta pone nan den un posicion hopi dificil. Esaki ta trece consecuencianan negativo tanto financiero como pa e companianan di tour en general.