Apresiabel señor Minister Javier Silvania,
Na yüni último a paga trahadónan públiko e gratifikashon(esta e “San Antoni”) di naf. 1750,-, den mesun rosea gobièrnu di Kòrsou públikamente a primintí ku lo bai duna gratifikashon na e trahadónan di e entidatnan semi-/gubernamental tambe. A bai mas aleu di a publiká e lista di entidatnan semi-/gubernamental ku lo paga esaki na e trahadónan.
Suskrito a wòrdu aserka pa diferente siudadano ku ta laborá na un di e entidatnan semi-/gubernamental ku e preokupashon ku nan no a risibí e “San Antoni”, asta a wòrdu bisa ku lo no bai risibí esaki pa motibu ku a uza esaki pa paga otro kos. E pregunta ku ta surgí ta, e desishon pa no paga, ta di parti di gobièrnu òf di e entidatnan semi-/gubernamental.
Pa e motibunan ariba menshoná i hasiendo uso di artíkulo 96 di Reglamentu di órden di Parlamento di Kòrsou, suskrito kier a hasi Minister Javier Silvania e siguiente preguntanan;
- Gobièrnu a hasi e pago pa gratifikashon na e entidatnan semi-/gubernamental?
- Kua ta e entidatnan ku a risibí esaki?
- Tabatin palabrashon ku e entidatnan semi-/gubernamental ku e sèn risibí lo ta designá pa pago di gratifikashon?
- Kuantu sèn kada un di entidatnan aki a risibí di parti gobièrnu pa ku e pago di gratifikashon?
- Kon minister lo bai kontrola ku enberdat e entidatnan aki a uza e sèn pa pago di gratifikashon?
- Si e entidatnan aki no paga trahado kiko ta e siguente paso ku minister lo bai tuma?
Sperando ku Minister lo kontesta nos karta den e tempu definí den e protokòl firma entre gobièrnu di Kòrsou i Parlamento.