Minister Geoffrey Wever tawata den Parlamento di Aruba pa asina informa Parlamento riba
incentivonan fiscal cu gobierno lo introduci pa Oranjestad y San Nicolas. Durante e reunion
nos a bisa cu nos no tin nada contra e incentivonan fiscal aki. Di otro banda nos a puntra
minister Wever si ki dia comerciantenen den otro districtonan y barionan por spera un
incentivo fiscal di keda 10 aña sin paga winstbelasting? Tur comerciante sea chikito of grandi
cu ta situa sea na Pos Chiquito, Savaneta, Brazil, Piedra Plat, Santa Cruz, Paradera, Tanki
Flip, Tanki Leendert y Noord lo desea di haya un alivio fiscal di keda 10 aña sin paga
winstbelasting!
E ora nos a haci e pregunta na minister Wever kico ta su plan pa adresa e retonan cu
comerciantenen den otro disctricto tini y ki dia lo introduci un areglo cu lo yuda trece alivio
pa otro comerciantenen cu NO ta den Oranjestad of San Nicolas.
Na e momentonan aki tin un situacion explosivo na Aruba debi na e costo di bida y poder di
compra. Tur dia tin aumento di prijsnan y pueblo no tin caminda mas pa sconde pa sla di
prijs. 100 florin a bira manera 10 florin actualmente na Aruba. En bes di cu e gobierno aki di
AVP-Futuro a haci algo pa cambia e situacion nan a tuma decisionan pa aumento e gastonan
riba pueblo.
E gobierno aki a aumenta:
– Prijs di gas
– Prijs di gasolin
– Prijs di diesel
– Prijs di pan
Tur e aumentonan aki a conduci cu pueblo su poder di compra a bay atras drasticamente.
Segun banco central 88% di encuestado cu a participa na nan encuesta a indica cu ultimo 11
lunanan nan poder di compra a bay atras drasticamente. Oficina Central di Estadistica (CBS)
a indica cu e bestaansminimum a conoce un aumento y famianan mester mas placa pa
sobrevivi. Masha hopi hende ta traha 2 trabou paso placa no ta alcansa y Banco Central a bisa
cu e clase media na Aruba ta despareciendo. Enbes cu gobierno di AVP-Futuro ta reconoce
esaki y ta adresa e situacion, minister Wever ta bisa cu na Aruba no tin inflacion sino
deflacion!
Gobierno berdad a yuda pensionadonan cual nos gobierno tambe a haci. Nos gobierno a duna
pensionadonan aumento di 400 florin pero e diferencia entre nos gobierno y e gobierno actual
ta e hecho cu nos a corda riba e clase media tambe. Nos a duna un reduccion di impuesto cu
35.000 hende a haya un alivio fiscal.
En cambio e gobierno aki a duna aumento pa pensionadonan pero e la lubida e homber
chikito, lubida e clase media, lubida esnan cu tin cu haci 2 trabou y pesey nos a puntra kico
minister Wever lo haci pa mehora nan poder di compra, trece alivio fiscal pa e grupo aki
pasobra tin atencion pa pensionadonan, cual sigur ta algo cu nos ta apoya, pero nos NO
mester lubida e grupo grandi aki cu ta e backbone di nos economia. E gobierno aki NO tin
atencion pa e homber chikito, esun cu ta gana sueldo minimo y e clase media!