For di dia 19 di november 2025, Minister Gerlien Croes a haci un biahe di trabou pa Corsou haciendo uzo di un private jet, algo cu sigur no ta usual pa un mandatario. Nos trabou como miembro di Parlamento ta pa controla y vigila gobierno. Den e contexto aki, nos a haci preguntanan na Minister Croes for di november di aña pasa riba su biahe cu jet priva, pa asina, den cuadro di e transparencia cu e propio Minister Croes semper a boga p’e, haya claridad riba e biahe aki.
183 dia sin contesta: Un falta di respeto na Parlamento y pueblo
Awe a pasa 182 dia sin cu Minister Croes kier contesta nos preguntanan. Minister Croes no ta respeta nos Constitucion, pasobra segun nos ley fundamental, un minister tin e deber y obligacion di contesta preguntanan di Parlamento. Minister Croes no ta respeta Parlamento, y mucho menos pueblo. Nos ta representa pueblo y pueblo ta exigi claridad. Un minister mester ta sincero, honesto, y mester ta transparente den su accionnan. Minister Croes ta practicando un politica di gañamento structural y organisa. El a priminti un politica nobo, un politica diferente, un politica di transparencia y honestidad. Awe e ta practica “old school politics”: un politica di gañamento, manipulacion y te hasta persecucion di tur esunnan cu no ta comparti su pensamento.
Pagonan cuestionabel y falta di transparencia
Un biahe cu un avion priva pa Corsou ta costa entre $8,000 cu $10,000. Minister Croes a bisa desde aña pasa cu e mes a paga pa esaki, pero te awe e NO kier contesta Parlamento con el a paga esaki, na ken el a paga y cuanto el a paga. E licencia cu e avion aki tin no ta permiti cobra pasahero, nificando cu ta zona basta straño cu Minister Gerlien Croes ta bisa cu e mes a paga pa e biahe aki. Minister Gerlien Croes por a caba cu e discusion aki desde aña pasa si e tabata honesto y sincero, pero el a opta pa ta un gobernante arogante. Su arogancia y falta di respet pa nos Constitucion y nos Parlamento ta muestra cu transparencia a bira su enemigo. Tanto cu el a boga pa transparencia, awe cu e ta den “drivers seat” e ta core, ta sconde, ta keda sin contesta y no kier debati.
Nos di fraccion di MEP te hasta a bay un LOB-verzoek, cual Minister Croes a opta tambe pa keda sin contesta. No solamente e ta stroba Parlamento di haci su trabou, pero e actitud di arogancia y superioridad cu Minister Gerlien Croes kier demostra ta bergonsoso. El a lubida algo hopi fundamental: pueblo ta pone y pueblo ta kita, y ora transparencia bira bo enemigo como minister, pueblo lo saca su propio conclusion!