E Comision di LAR a emiti un conseho formal instruyendo Minister Gerlien Croes pa entrega e pruebanan di pago relaciona cu e uzo di un jet priva. Cuater siman a pasa y e Minister ainda no a contesta. Esaki no ta solamente un falta di transparencia, sino un negacion directo di un obligacion legal.
Un promesa cu e Gobierno mes a haci
Riba pagina 12, punto 8 di nan propio acuerdo di gobernacion, Gabinete AVP-Futuro a compromete su mes na reenforsa e funcionamento di e Comision di LAR pa asina garantisa cu consehonan ta wordo emiti y respeta dentro di e termino stipula pa ley. E meta tabata cla: evita perhuicio pa e ciudadano, impedi gasto innecesario di abogado, y evita cu Gobierno mes ta malgasta placa di contribuyente na abogadonan pa cubri su propio negligencia. Awe, e Gobierno ta haci exactamente loke el a priminti di evita.
Kico a pasa?
Minister Croes a declara inicialmente cu e mes a paga e buelo den e jet priva, pa despues cambia su version y bisa cu el a comparti e gasto. Pa e motibo aki, dos parlamentario a pidi e pruebanan di pago conforme articulo 59 di e Reglamento di Ordo, pero e Minister no a contesta. Consecuentemente, a sigui un peticion via e Ley di Openbaarheid van Bestuur (LOB), cu ta obliga e Minister legalmente na duna un contesta, pero e a ignora esaki tambe.
Despues di e silencio aki, e parlamentarionan a acudi na LAR. E Comision a evalua e caso y a emiti su conseho dia 10 di juli 2026: e Minister tin e deber di entrega e informacion. Cuater siman despues, e Minister ta sigui den silencio.
Dos opcion ta keda
Minister Croes tin dos caminda:
Opcion 1: Entrega e pruebanan: clarifica si e mes a paga e buelo of cu ken e a comparti e gasto. Conforme un opinion legal di un consehero specialisa den aviacion, un share cost sin e permiso adecua por resulta den consecuencianan legal serio pa e compania di aviacion involucra. Y si resulta cu un agencia di e Minister su propio oficina a regla of financia e buelo, e situacion ta bira significativamente mas serio, pasobra esaki lo nifica cu e Minister a gaña tanto Parlamento como e pueblo.
Opcion 2: Keda sin contesta: si dentro di seis siman e Minister no responde, e parlamentarionan lo acudi na Corte di Husticia.
E pregunta pa pueblo
Ta lamentabel cu, despues di casi nuebe luna di espera, mester acudi na instancianan legal pa un peticion di rutina cu den e resto di Reino Hulandes ta algo completamente normal. Sinembargo, e punto mas alarmante no ta e silencio mes, sino e placa. Placa di pueblo ta wordo gasta na abogadonan pa defende e falta di contesta aki, cu ta recursonan cu por a wordo uza pa deporte, enseñansa, y e necesidadnan real di nos comunidad.
E Gabinete aki a gaba di transparencia y bon gobernacion den nan propio programa, y awo Minister Croes ta den e posicion pa demostra si esaki ta mas cu simplemente palabranan riba papel.