Liderazgo no ta solamente ocupa un cargo politico. Segun parlamentario Eduard Pieters, e berdadero liderazgo ta cuminsa cu e forma con un persona ta comunica, traha cu hende y mantene su balornan den e momentonan dificil. Cu e mensahe aki e lider di fraccion di Partido Patriotico Arubano (PPA) a participa den un encuentro cu e hobennan, caminda representante di diferente líder di fraccion parlamentario a comparti nan experiencia y vision tocante liderazgo y servicio publico.
Nificacion concreto di liderazgo
Pieters a bisa cu e obhetivo principal tabata inspira e siguiente generacion di e lidernan, compartiendo algun di e principionan cu ta guia su trabou diario como lider.
“Liderazgo ta hopi importante pa nos hobennan. Nan ta e futuro di Aruba y e decisionnan cu nan ta tuma mañan, lo determina con nos pais lo sigui desaroya.”
Segun Pieters, liderazgo no ta defini solamente door di autoridad, sino principalmente door di responsabilidad. E parlamentario a enfatisa cu un lider mester sa comunica, crea relacion y ta dispuesto pa guia cambio positivo den comunidad. “E lider no ta esun cu simpelmente ta manda. Un lider mester sa tende, comunica y conecta cu hende. Un lider mester por inspera hendenan tuma accion, no pasobra nan mester, sino pasobra nan kier”
E cualidadnan esencial di un lider
Durante su presentacion, Pieters a destaca diferente cualidad/habilidad y responsabilidad cu, segun estudionan cientifico, ta esencial pa cualkier persona cu kier ocupa un rol di liderazgo. Entre esunnan cu el a menciona tabata e importancia di comunicacion efectivo, construccion di e relacionnan humano, ta un agente di cambio pa cambia e status quo, e capacidad pa adapta na e circunstancianan cambiante, pues flexibilidad y primordialmente mantene integridad na tur momento di dia basa riba bo ideal- y creencianan. “Un lider mester ta flexibel,” el a bisa. “Bo ta traha cu hende y cada persona ta diferente. Si bo no por adapta sin perde bo principionan, lo ta dificil pa guia otro.”
Compas moral
Sinembargo, segun Pieters, e fundeshi di tur liderazgo ta basa riba algo hopi mas profundo cu tecnica of experiencia. “Bo norma, bo balornan, bo idealnan y bo creencianan ta bo compas moral. Esey ta loke lo guia bo, ora bo mester tuma e decisionnan dificil.” Pa lider di fraccion di PPA, precisamente den un mundo cu ta cambia constantemente, e hobennan mester siña cu liderazgo no ta midi door di popularidad, sino door di e decisionnan cu un persona ta dispuesto pa tuma ora tin presion.
Preparacion pa bida
“Bo caracter ta loke realmente determina ki tipo di lider bo lo bira.” Pieters a conclui na e encuentro cu Parlamento Hubenil y e no tabata referi solamente riba e area di politica, sino pa motiva e hobennan pa pensa riba nan propio futuro y e rol cu nan por hunga den sociedad y pa nan por ta agente di cambio.
“Nos kier pa nan sali di akiden cu mas conocemento, pero tambe cu mas confiansa den nan mes pa realmente nan ta empodera y por ta di berdad un agente di cambio. Aruba tin mester di e lidernan cu tin preparacion, responsabilidad y amor pa pais.”
Segun Pieters, inverti den liderazgo hubenil ta un di e mihor inversionnan cu un pais por haci, pasobra e lidernan di mañan ta forma cu e balornan cu nan ta siña awe.
