Prijs di productonan ta decision di gremionan
Globalmente a conoce un inflacion basta fuerte riba tur nivel cual a wordo causa pa e aumento di flete, aumento di petroleo, scarcedad di producto, y guera na Ukraina, cual a destabilisa no solamente e region, pero e mundo henter. Esakinan a subi costo di energia, causa aumento den transporte global y mucho mas. Tambe mester remarca cu Astec ta aumenta su tarifanan tur aña considerabelmente, y esaki tambe ta un di e factornan grandi cu ta aumenta prijs di productonan. Aruba ta un pais importador y no por scapa e aumentonan aki sin mas.
Informacion di invoerrechten riba cuminda
E ta bon pa sa cu e gran mayoria di cuminda no tin invoerechten. Algun ehempel di esakinan ta: carni di baca, carni di porco, carni cabrito of carne, pisca, lechi di baca, manteca, keshi, webo. Tur tipo di berdura fresco of congela tampoco conoce invoerrechten. Coffee, thee, y aros. Asina tin masha hopi productonan mas cu ta liber di invoerrechten. Pueblo por wak document completo di esaki riba e website di Douane. Den otro palabra, e ta bon pa pueblo sa, cu aumento di prijs no tin di haber cu gobierno pero directamente cu decisionan di e gremionan. Consumidornan mester ta consciente di e realidad cu tin un “Mercado liber” y cu supermercado y tiendanan ta dicidi riba e prijs.
Canasta Basico
Conoce e productonan den canasta basico ta hopi importante. Esaki lo yuda e consumidor di ta mas enfoca pa cumpra e productonan aki, sabiendo cu esakinan ta wordo regula pa gobierno. Di e forma aki famianan por rende nan placa mas y alimenta nan famia cu alimentonan bon pa e famia. Actualmente e canasta basico ta consisti di 1205 producto di diferente marca y contenido. E canasta basico ta consisti di e siguiente productonan:
- Aros, babyfood, baby formula, coffee, thee, corn flour, coffee milk, leche en polvo, azeta pa cushina, broccoli, sponazie y mixed vegetables frozen, boonchi cora, preto y lima seco, tuna fish den bleki, sardin den bleki, salmao den bleki, all purpose flour, spaghetti, oatmeal, UHT Milk. Tambe webo local ta cay bao di e canansta basico y pan blanco. Na Mei di e aña aki a amplia e canasta basico cu algun producto mas; galiña henter congela, cornflakes, pindakaas, frutanan seco y congela y pampers.
Control di e canasta basico y prijs di productonan
Control di e canasta basico ta wordo haci diariamente pa e departamento di economia. Tin un ekipo ta sali tur rond di Aruba pa asegura cu e prijsnan ta wordo honra. Sinembargo, e consumidor por aporta conscientemente dor di wak e prijsnan y denuncia e lugarnan ora cu nan ta surpasa e prijs stipula pa gobierno y asina yuda sigura cu e prijsnan ta wordo honra pe supermarketnan. Pa loke ta trata e productonan cu ta pafo di e canasta basico; compara prijs, y cumpra unda ta cumbini. Informa otro riba plataforma social di esnan cu ta abusa den tempo di crisis. Asina nos ta yuda otro shop “mas pa menos.”
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!