Parlamentario Marco Berlis (MEP) ta haci un propuesta na Gobierno di Aruba: Pidi WEB Aruba N.V. pa kita e “late fee” pa e grupo di pensionadonan

Recientemente mi a wordo acerca pa pensionadonan cu tin problema pa paga e recibo di WEB na tempo, ya cu nan ta cobra net un dia prome. Pa via di e pagamento un poco laat WEB ta cobra e pensionadonan aki un “late fee” di 10 florin cada luna. Esaki sigur ta hopi fastioso mirando cu hopi di e pensionadonan aki no ta traha bon cu tecnologia, nan no por paga e cuenta tampoco via online banking. Pensionadonan preocupa cu e situacion aki no ta compronde pakico WEB no por bin cu un solucion pa nan enbes di djis keda cobranan dies florin tur luna.

Proposicion pa elimina e “late fee” pa pensionadonan

Mirando e situacion fastioso di e pensionadonan, mi a dicidi pa propone cu firmesa pa gobierno di Aruba como “grootste aandeelhouder” di Utilities y WEB elimina e late fee aki pa nos pensionadonan. Prome cu tur cos nos mester corda cu nos pensionadonan a traha duro caba pa e progreso di nos pais. Nan labor y sudor di pasado a forma e fundeshi y columnanan di nos pais. Nos pensionadonan merece e miho trato posibel, y ta pesey mi a dicidi pa acerca minister di Energia sr. Glenbert Croes pa elimina e late fee di 10 florin aki pa tur pensionado. Aunke nos ta den e tempo di crisis, no mester descarta e situacion di nos grandinan. Pesey mi ta urgi gobierno y minister Glenbert Croes pa actua liher riba e asunto aki y tuma un decision pa trece un alivio pa nos grandinan.

Preocupacionan di nos grandinan tin oido cerca bo Parlamentario.Mi ta compronde cu mi ta un representante di Pueblo y cu mi ta den Parlamento pa ta e bos di nos ciudadanonan. Mi ta tuma tempo y dedicacion pa por vocifera e preocupacionan di pueblo, actua pa soluciona, y intermedia unda cu mi por. No ta tur ora por yega na un solucion concreto, sinembargo semper mi lo para pa loke ta corecto y yuda esnan vulnerabel den nos sociedad y esnan cu ta den necesidad di husticia. 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!