ORANJESTAD,Aruba
Esaki ta e conclusion despues di a reuni cu sindicatonan SEPPA, SIMAR, SPA y SADA riba e ley pa austerisa salario y beneficionan di empleadonan publico. “Fraccion di AVP ta comparti e preocupacionan cu sindicatonan a trece dilanti, a hasi preguntanan al respecto y ta sperando contesta prome cu tratamento di e ley,” asina miembro di Parlamento pa fraccion di AVP, Sr. Richard Arends, a declara.
Na ningun momento nos a pretende di kere cu trahadonan publico no ta solidario, especialmente esnan prome yama durante pa traha 100% durante e periodo di crisis aki. E preocupacion cu a wordo treci dilanti ta solamente e incertidumbre cu cierto partinan di e ley ta trece cun’e y tambe limitacion di control y evaluacion di parti di Parlamento. Fraccion di AVP siguramente pa evaluando e posibilidadnan pa introduci mas transparencia dunando oido na e precupacionan treci dilanti.”
“Reduccionnan di salarionan di empleadonan publico y fundacionan lo a resulta den un reduccion di 60 miyon di florin for di presupuesto, pero Gobierno mes den su gastonan di huur, abogado y servicionan a corta 9 miyon di un total di 200 miyon so,” Parlamentario Arends a bisa. “Y esakinan ta djies e condicionnan pa e di dos tranche di sosten di likidez cu Aruba a ricibi caba. Aki algun dia ta un serie nobo di condicion lo ta riba mesa pa e di tres tranche y esunan siguiente. Gobierno a palabra di a entrega un plan di reforma y reduccion di gasto cu ainda no ta conoci na Parlamento.”
E Parlamentario a remarca tambe cu mientras na Aruba ta discuti riba e efecto ‘tot nader orde’ di e medidanan di austeridad aki, Hulanda ta papia di recortenan structural. “Esaki ta un diferencia substancial, pero Gobierno mester ta honesto y directo cu su trahadornan y no tira culpa riba COVID-19 of riba Hulanda pa palabracionan cu nan mes a hasi. Gobierno ta e unico organo na e momento aki cu por informa su trahadornan, Parlamento y comunidad debidamente.”
Durante Dialogo Social sindicatonan hunto cu gobierno y sector priva tabata sinta lunanan tras di otro y a yega na protocolnan cu ta contene acuerdonan duradero y reformanan cu a elimina riesgonan pa nos finansas publico awe. Esaki a wordo treci dilanti tambe pa sindicatonan tambe cu a participa den pasado. “Ora cu eyfo sindicatonan ta wordo critica di a entrega mas beneficio e tempo ey, mester pone den contexto correcto. Sindicatonan a asumi nan responsabilidad y salbaguardia fondonan social y di pensioen,” Sr. Arends a memora. “Danki na decisionan den cuadro di Dialogo Social awe APFA no ta core peliger memei di e crisis mas grandi di nos historia y SVb ta rekeri solamente sosten di likides. Esaki ta e buffer di berdad cu Aruba tin danki na e cooperacion di sindicatonan, gobierno y sector priva den pasado.”