PoliticaFeatured

Parlamentario Ricky Hoek (MEP): Debatenan cara-a-cara durante IPKO

Parlamentario Ricky Hoek 1

For di 1 te cu 5 di juni ultimo tabata tin e reunionnan importante di IPKO (Interparlementair Koninkrijksoverleg) na Den Haag Hulanda. Tanto e Parlamentarionan di Sint Maarten, Corsou, Hulanda y Aruba a presenta cara-a-cara pa trata temanan actual den Reino Hulandes. Adicionalmente, for di 6 te cu 9 di juni fraccion di MEP a haci bishita na diferente instituto importante na Hulanda. 

Riba e di 2 dia di e reunionnan di IPKO especialmente, tabata tin debatenan publico den e sala di Tweede Kamer. Debatenan hopi interesante y importante riba temanan cu ta entre otro: procesamento di e pasado di sclavitud y colonialismo, establecimento di un museo nacional di sclavitud (na Hulanda), conferencia di Reino, clima y medio ambiente den Caribe Hulandes, situacion di studiantenan Arubiano/Caribense na Hulanda. 

E topiconan aki ta importante pa debati riba nan na un forma personal, pasobra hopi biaha e Hulandes Europeo no ta compronde e contexto Caribense completamente. Hopi biaha e politiconan Hulandes ta kere cu e procesonan y decisionnan cu ta wordo tuma na Hulanda ta bay mesun facil na e paisnan Caribense di Reino Hulandes. Tin ora, poco comprension ta wordo teni cu e islanan den Caribe siendo cu nos ta parti di e mesun Reino y no ta haya e mesun trato. Un ehempel ta den caso di studiantenan Arubiano (Caribense) cu no ta facilmente yega na un BSN-nummer pa por regla nan cuenta bancario, vivienda y haya un ‘bij-baantje’. Esaki ta trece tardansa den e proceso pa nan por establece nan mes bon na Hulanda cu consecuencia cu nan no por focus completamente riba nan studio y asina ta crea un cuestion cu ta influencia e otro. 

Ta door di debati y papia cu e coleganan politico Hulandes cara-a-cara, por yega na un entendimento mas profundo di e obstaculonan (‘struikelblokken’) di e studiantenan. 

No solamente e situacion di e studiantenan ta importante pa nan sa, pero tambe con e desaroyo di e debenan financiero di nos pais a cuminsa. Na prome luga, ta asina cu Hulanda ta exigi pa Aruba paga bek tur debe na un percentahe halto, pero lastimamente no tur politico Hulandes tin un bista completo riba e cuadro financiero di nos pais. Por ehempel, Hulanda ta desea pa e tres paisnan di Reino Hulandes den Caribe haya un Rijkswet financiero caminda ta bin un supervision cu ta stipula con y cuanto mester paga. Den e caso aki, Aruba ta trahando cu un LAft (Landsverordening Aruba financieel toezicht) cu ta un supervision financiero pa algun aña caba. 

Na di dos luga, na luna di mei di 2022 Parlamento di Aruba a manda algun pregunta por escrito tocante e Rijkswet y su implicacionnan pa Aruba. Te dia di awe, Parlamento di Aruba (ni di Corsou y Sint Maarten) no a ricibi ningun contesta riba e preguntanan. Esaki ta un muestra di falta di respet di banda di Gobierno Hulandes pa e Parlamento di Aruba. Den e caso aki, a atende cu e coleganan Parlamentario Hulandes, cu nan mester exigi nan Gobierno pa duna e Parlamento di Aruba un contesta riba e preguntanan. Si no bin un contesta, esaki ta tranca e proceso di negocia e tan deseabel ‘consensus’rijkswet cu Hulanda ta desea di impone riba Aruba. Anto ta na e momentonan manera IPKO aki, Parlamentarionan di Aruba (lastimamente no esnan di oposicion) ta boga pa Hulanda tin mas comprendemento y ta habri pa papia y negocia cu si ta bin un ‘consensus’rijkswet of no y kico lo ta e condicionnan di pago cu lo mester tuma lugar pronto. 

Ta pesey ta sumamente importante cu e reunionnan di IPKO ta wordo ehecuta den forma presencial, pa asina e coleganan Parlamentario di Reino por tuma tempo y informa otro debidamente riba aspectonan cu ta toca nos tur na Aruba y e otro islanan den Caribe. 

Tanten cu e Reino Hulandes ta existi y consisti di Hulanda, su municipionan Caribense, y e tres paisnan den Caribe, e reunionnan di IPKO ta di balor agrega pa e bon relacionnan y colaboracionnan den Reino Hulandes. 

Related posts

Rolando Maduro (SPA): Ta hopi importante pa tin suficiente informacion prome e polis sali pa asistencia

EA News Author

E 24 medidanan den persupuesto na momento cu AVP a haya KB a perhudica Ambtenaarnan y pensionadonan

EA News Author

Entidat Públiko Boneiru ta apoyá trahadónan sosial riba nan dia

EA News Author

Leave a Comment

Whatsapp Message