Dialuna 30 di maart 2026, a tuma lugar e reunion di Comision Fiho di Finansas,
Organisacion Gubernamental, Cultura y Deporte y Comité Olímpico Arubano (COA) cu mi a
organisa.
Nos a ricibi e presentacion oficial di e Plan di Maneho 2026 di COA. Alabes nan a presenta
nan vision strategico pa fortalece e sector deportivo como un pilar importante den desaroyo
social y economico di Aruba.
Durante e presentacion, COA a trata diferente prioridadnan pa 2026, entre nan: desaroyo di
talento local, atencion pa salud mental di atleta, digitalisacion y uso di Inteligencia Artificial,
fortalecemento di transparencia y bon gobernansa, ampliacion di visibilidad local y
internacional, y integracion di sostenibilidad (ESG) den su maneho.
Riba tereno financiero, COA a enfatisa su compromiso cu disciplina y responsabilidad
financiero, mientras cu ta explora posibilidadnan pa crea fuentenan nobo di entrada pa sigui
inverti den atletanan y desaroyo di deporte na Aruba.
Na final di e reunion, mi a wordo oficialmente nombra como embahador di COA, un rol cu ta
reforsa e conexion entre deporte y gobernansa, y cu ta reconose e importancia di liderazgo y
compromiso pa promove deporte na nivel nacional.
Parlamento tin un papel importante pa hunga den e desaroyo di deporte, no solamente den
nos rol di control y aupervision, pero tambe den creacion di e marco legislativo necesario pa
sostene e sector. Den esaki, COA a presenta varios sugerencia concreto unda Parlamento por
contribui, manera proteccion di atleta, introduccion di estimulo fiscal pa deporte, y
facilitacion di combinacion entre deporte, educacion y trabou.
E Comision ta aprecia e presentacion di COA y ta comprometí pa sigui dialogo y evaluacion
di e posibilidadnan presenta. Den e proximo periodo, e Comision lo realisa un bishita na
COA pa profundisa e intercambio di informacion.
Sigur mi kier gradici e team completo di COA y coleganan parlamentario pa e tremendo
reunion. “Paso pa paso, dia pa dia, nos ta yega e meta – hunto.”
